Markás 7 - Hodáay Pákén Ketáb Balochi zobáná

Delpáki

¹ Cha Urshalimá átkagén lahtén Parisi o Sharyatay zánóger Issáay kerrá mocch but.

² Distesh ke Issáay lahtén morid gón nashoshtagén, bezán gón sell o nápákén dastán waráka wárt.

³ Chéá ke Parisi o sajjahén Yahudi, tánke wati pet o piroki dini rahbanday sará dast mashódant, waráka nawarant.

⁴ Wahdé cha bázárá káyant, tán shosht o shód makanant heccha nawarant o dega bázén hamé dhawlén dód o dáb hastant chosh ke, tán waráki darp o hiránán pésará mashódant kármarza nakanant.

⁵ Paméshká, Parisi o Sharyatay zánógerán cha áiá jost kort: “Chéá tai morid pet o piroki rahbandáni randgiriá nakanant o gón sell o nápákén dastán waráka warant?”

⁶ Áiá gwasht: “Oo doru o dopóstén mardomán! Eshayá nabiá cha Hodáay némagá shomay bárawá sharr nebeshtag: É mardom dapá maná satá dayant, bale delesh cha man báz dur ent.

⁷ Á moptá maná parastesha kanant o mardománi jórhéntagén ráh o rahbandán sója dayant.

⁸ Shomá Hodáay hokm yalah dátagant o mardománi ráh o rahband geptagant.”

⁹ Randá gwashti: “Shomá pa wati dód o rahbandáni kár bandagá Hodáay hokmáni yalah dayagay sharrén ráhé dar gétkag.

¹⁰ Chéá ke Tawrátay tahá Mussáyá gwashtag: Wati pet o mátá sharap o ezzat beday. Harkas ke wati pet o mátá záh o dwá bedant, báyad ent koshag bebit.

¹¹ Bale shomá mardomán chosh sója dayét ke yakké wati pet o mátá komakk makant o begwashit: ‘Pahell kanét, á komakk ke man báyad ent shomárá bedátén, Hodáay ráhá korbánig kortag.’

¹² Shomá á mardomá gón é sar o sójá, cha wati pet o mátay komakk kanagá makan o manaha kanét.

¹³ Shomá gón wati dód o rahbandáni barjáh dáragá, Hodáay habarán nákára kanét o dega bázén hamé dhawlén kára kanét.”

¹⁴ Padá áiá rombé mardom wati kerrá lóthet o gwashti: “Shomá mani habarán gósh bedárét o sarpad bebét.

¹⁵ Chizzé ke mardomay lápá rawt áiá sell o nápáka nakant, bale chizzé ke cha delá dara kayt, mardomá nápáka kant.

¹⁶ Harkasá pa eshkonagá gósh per, beshkont.”

¹⁷ Wahdé mardomi yalah dátant o lógá átk, moridán gwasht: “Márá é mesálay maksadá sarpad kan.”

¹⁸ Issáyá gwasht: “Shomá haminkadar násarpad ét? Hecch warákay warag mardomá sell o nápáka nakant,

¹⁹ chéá ke delá narawt, lápá rawt o cha rótán dara kayt.” Gón é mesálá, áiá gisshént ke sajjahén waragi chizz, helár o pák ant.

²⁰ Padá gésh kanáná gwashti: “Á chizz ke mardomá sell o nápáka kant, cha áiay del o daruná chesta bit o áiá nápáka kant,

²¹ chosh ke badén pegr o hayál, bénangi, dozzi, hón o kósh, zená,

²² lálech o tamáh, badwáhi, mandr, waylánki, hasadd, kopr, takabbor o ahmaki.

²³ É sajjahén badi, cha mardomay daruná sarchammaga gerant o mardomá sell o nápáka kanant.”

Darkawmén janénéay báwar

²⁴ Issá cha ódá dar átk o Suray sardhagárá shot. Ódá lógéá shot o nalótheti ke kasé áiay áyagá sahig bebit, bale watá chér dát nakort.

²⁵ Janéné ke áiay kasánén jenekká jenné per at, wahdé Issáay áyagay háli eshkot, hamá damáná átk o áiay pádán kapt.

²⁶ É janén Yunánié at o Suriahay damag Pinikiahá pédá butagat. Áiá Issá mennat o dazbandi kort ke jenná cha jenekká dar bekant.

²⁷ Issáyá gwasht: “Awalá báyad ent chokk warag bwarant o sér bekanant, chéá ke cha chokkáni dastá nánay pach gerag o kochekkáni démá dawr dayag sharr naent.”

²⁸ Janéná gwasht: “Oo Hodáwand! Bale kochekk ham chokkáni parzónagay sarárókén naganay thokkorána warant.”

²⁹ Issáyá gwasht: “Taw sharrén passawé dát, beraw, tai jenekkay jenn dar átkag.”

³⁰ Wahdé janén lógá per tarret, disti ke jenekk tahtay sará waptag o jenná yalah dátag.

Karr o lellén mardéay drahbakshi

³¹ Issá, cha Suray sardhagárá per tarret, Sayduni gwázént, dém pa Jalilay mazangwarm o Dekápulisay sardhagárá átk o raset.

³² Mardomán yakk karrén mardé ke zobáni ham lell o chacch at, Issáay kerrá áwort o dazbandiesh kort ke wati dastá áiay sará per bemoshit.

³³ Issáyá á mard cha mardománi mocchiá yakk kerré bort o lankoki áiay góshán mán kortant. Randá áiay zobánay sará lebzi per mosht.

³⁴ Ásmánay némagá cháreti, áh o ginsárté kasshet o gwashti: “Effatah!” (Bezán “pach bay!”)

³⁵ Hamá damáná, marday gósh pach butant, zobáni ham pach but o pa sharri habar kanagá lagget.

³⁶ Issáyá, mardom báz kaddhan kortant ke gón hechkasá é bárawá hecch magwashant, bale haminchok ke áiá pa habar nakanagá kaddhan kort, mardomán habar haminkadar géshter tálán kort.

³⁷ Mardom báz hayrán atant o gón yakdomiá gwashtesh: “É chónén ajabén nékén kára kant, karráni góshán pacha kant o lelláni zobáná ham bójit.”