Markás 5 - Hodáay Pákén Ketáb Balochi zobáná

Jenni ganókéay drahbakshi

¹ Issá o áiay morid, Jalilay mazangwarmay domi pahnátá Gerásiáni sardhagárá rasetant.

² Wahdé Issá cha bójigá ér átk, hamá damáná yakk mardé ke jenné per ati, cha kabrestáná dar átk o gón áiá dochár kapt.

³ Á, kabrestáná jahmenend at o haminchok zóri mán at ke hechkasá áiay dast o pád gón zamzilá ham kayd korta nakortant.

⁴ Pésará báz randá mardomán kayd kortagat, bale áiá zamzil próshtagatant o hechkasá áiay ger o dáray wák o twán néstat.

⁵ Á, shap o róch kabrestán o kóhán neshtagat, kukkár o chihália jat o watá gón dhók o sengá thappigia kort.

⁶ Anchosh ke Issái cha durá dist, tacháná áiay némagá átk o Issáay pádán kapt.

⁷ Gón kukkár o chiháléá gwashti: “Issá, oo mazanshánén Hodáay Chokk! Tará gón man che kár ent? Tará Hodáay sawgend ent, maná azáb maday.”

⁸ Chéá ke Issáyá gwashtagat: “Oo palitén ruh! É mardá yalah day.”

⁹ Issáyá cha áiá jost kort: “Tai nám kay ent?” Áiá passaw dát: “Mani nám ‘Lashkar’ ent, chéá ke má báz én.”

¹⁰ Padá áiá gón Issáyá báz randá mennat o zári kort ke “Márá cha é sardhagárá dar makan.”

¹¹ Hamódá jompéay sará, hukkáni mazanén ramagé charagá at.

¹² Jennán dazbandi kort o gwasht: “Márá ráh beday tánke hamé hukkáni jesmá poterén.”

¹³ Issáyá ejázat dátant. Gorhá, jenn dar átkant o hukkáni jesmá potertant. Hukkáni ramag ke do hazáray kesásá at, cha jompá jahlagá ér kapáná gwarmá bokket.

¹⁴ Gorhá, hukkáni shwánag shahr o métagán tatkant o mardomesh é bárawá hál dátant. Wahdé mardomán é habar eshkot, átkant tán gón wati jenday chammán é sargwastá begendant.

¹⁵ Issáay gwará ke átkant distesh, hamá mard ke pésará jennán ganók kortagat, hamedá neshtag, pocch o pósháki gwará o pa hósh o sár ent. Nun torsesh delá nesht.

¹⁶ Á ke wat chamdistén sháhed atant, kessahesh kort ke jenni ganók chónaká hósh o sár butag o hukk che paymá gwarmá bokketagant.

¹⁷ Gorhá mardomán gón Issáyá dazbandi kort ke áyáni sardhagárá yalah bedant o berawt.

¹⁸ Wahdé Issá bójigá swár bayagá at, á mardá ke jenná yalah dátagat, dazbandi kort: “Maná wati hamráh kan.”

¹⁹ Bale Issáyá ejázat nadát o gwashti: “Lógá beraw o wati mardomán hál beday ke Hodáwandá pa taw chónén káré kortag o tai sará chón bazzagi butag.”

²⁰ Gorhá, á mard shot o har káré ke Issáyá pa áiá kortagat, Dekápulisay sardhagáray mardomi hál dátant. Sajjahén mahluk, habakkah o hayrán but.

Issá janénéá dráh o jenekkéá zendaga kant

²¹ Wahdé Issá padá bójigá swár but o gwarmay á dastá shot, tayábay kerrá, mardománi mazanén rombé áiay chapp o chágerdá mocch but.

²² Yáerus námén mardé ke kanisahay master at, hamódá átk o gón Issáay gendagá, áiay pádán kapt.

²³ Gón áiá dazbandii kort ke “Mani jenekk markig ent. Byá o wati dastá áiay sará ér mosh, tánke dráh bebit o zendag bemánit.”

²⁴ Issá áiay hamráh but o shot. Dega bázén rombé mardom ham, angerr kanán gón áiá rawán but.

²⁵ Mardománi rombá janéné gón at ke dwázdah sál at áiay hón band nabutagat o

²⁶ cha bázén dáktarán pa wati elájá mazanén ranjé kasshetagati o sajjahén zarr o máli ham báhéntagatant, bale dráh bayagay badalá nájórhter butagat.

²⁷ Áiá pésará Issáay bárawá eshkotagat o nun cha mardománi nyámá Issáay poshtá átk o áiay kabáhi dast jat.

²⁸ Chéá ke áiay setk o báwar esh at ke agan Issáay pocchán ham dast per bekanán, dráha bán.

²⁹ Anchoshi kort, hamá damáná hón band but o cha wati jesmay hálatá sarpad but ke dráh ent.

³⁰ Issáyá zutt zánt ke yakk wák o kodraté cha áiá dar átkag. Gorhá áiá mardománi némagá chakk tarrént o josti kort: “Kayá mani pocch dast jatant?”

³¹ Moridán gwasht: “Oo wájah! Wat gendagá ay ke mardomán tará chón angerr kortag, angat ham josta kanay: ‘Kayá mani pocch dast jatant?’”

³² Issá angat chárén némagán cháragá at ke kayá é kár kortag.

³³ Bale hamá janéná ke é kár kortagat, zánti ke áiá chón butag o pa tors o larz átk, Issáay pádán kapt o é káray rástén habar o háli dátant.

³⁴ Issáyá gón áiá gwasht: “Oo mani jenekk! Tai setk o báwará tará rakkéntag, pa wasshi o salámati beraw o cha wati nájórhiá dráh bebay.”

³⁵ Issá angat habará at ke cha kanisahay masteray lógá, mardomé átk o Yáerusi hál dát ke “Tai jenekk mortag, nun pa ché ostádá géshter delsyáha kanay?”

³⁶ Issáyá áyáni habaráni némagá delgósh nakort o gón kanisahay masterá gwashti: “Mators, báwar kan.”

³⁷ Cha Petros, Ákub o áiay brát Yuhannáyá abéd, dega hechkasá hamráhiay ejázati nadát.

³⁸ Wahdé kanisahay masteray lógá átkant, distesh ke baláhén shór o walwalahé, mardom gréwag o mótk áragá ant.

³⁹ Lógá potert o gwashti: “Chéá shóra kanét o gréwét? Chokk namortag, bass wáb ent.”

⁴⁰ Mardomán gón é habaráni eshkonagá rishkandé jat, bale Issáyá cha hamá báná ke jenekk ódá at, sajjahén mardom dar kortant o gón jenekkay pet o mát o wati sayén moridán hamódá shot.

⁴¹ Issáyá jenekkay dast gept o gwashti: “Talitá kom!” Bezán: Oo jenekkok! Pád á.

⁴² Jenekk hamá damáná pád átk o tarragá lagget. Omri dwázdah sál at. Á mardom ke gón atant sakk hayrán butant.

⁴³ Issáyá pa trondi hokm kortant: “É habará gón hechkasá magwashét” o gwashti: “Jenekká warák bedayét.”