Markás 3 - Hodáay Pákén Ketáb Balochi zobáná

Dega mondhéay drahbakshi

¹ Dega randé, Issá kanisahá shot. Ódá mardé hastat ke dasti hoshk o mondh at.

² Neshtagén mardom Issáay entezár o wadárá atant ke agan é marday dastá Shambehay róchá dráh bekant, gorhá má áiay sará Shabbatay róchá kár kanagay bohtámá jata kanén.

³ Issáyá gón mondhén mardá gwasht: “Byá démá bósht.”

⁴ Randá gón á neshtagén mardomán gwashti: “Shabbatay róchá, néki kanag rawá ent yá badi? Ensánay zenday rakkénag yá koshag o gár kanag?” Á bétawár butant.

⁵ Issáyá pa zahr cháretant, chéá ke cha áyáni sengdeliá sakk padard but. Gón á mardá gwashti: “Dastá shahár day!” Áiá dast shahár dát o dasti wassh o dráh but.

⁶ Gorhá Parisi dhanná shotant o pa Issáay kóshárénagá gón Hirudián shawr o saláhesh bongéj kort.

Bázén mardomé Issáay randá ráha gipt

⁷ Issá cha mardomán dur, gón wati moridán gwarmay lambá shot. Bázén Jalili mardomé áiay padá rawán but.

⁸ Cha Yahudiah, Urshalim, Edumiah o Ordonay kawray á dastá ham bázén mardomé mocch but, Sur o Saydunay chapp o chágerday nendók ham átkant. Chéá ke áyán Issáay mójezaháni bárawá eshkotagat.

⁹ Issáyá gón moridán gwasht, bójigé pa áiá tayár bekanant tánke cha bázén mardománi mocchiay angerr o áshópá dur bebit.

¹⁰ Áiá bázén mardomé wassh o dráh kortagat, paméshká nádráhén mardom pa áiay dast per kanagá, télánk dayán, démá kenzán atant.

¹¹ Hamáyán ke jenn per at, wahdé Issáesh dist áiay pádán kaptant, kukkáresh kort o gwashtesh: “Taw Hodáay Chokk ay.”

¹² Issáyá hokm dátant: “Gón kassá magwashét man kay án.”

Dwázdah hásén káseday gechén kanag

¹³ Randá, Issá kóhay sará sar kapt o cha wati moridán lahténi hamódá lóthet o á Issáay kerrá átkant.

¹⁴ Issáyá cha áyán dwázdah kas gechén kort o wati hásén kásed náméntant, tánke gón áiá hamráh bebant o áyán pa wasshén mestágay sheng kanagá rawán bekant.

¹⁵ Jenn kasshagay ehtiári ham dátant.

¹⁶ Á dwázdahénáni nám esh ant: Shamun ke Issáyá áiay domi nám, “Petros” per bast,

¹⁷ Zebdiay chokk, Ákub o áiay brát Yuhanná ke Issáyá “grand o gerókay chokk” nám per bastant,

¹⁸ Andriás, Pilipos, Bartulumá, Mattá, Tumá, Halpiay chokk Ákub, Taddá, sarmachárén Shamun o

¹⁹ Yahudá Eskaryuti ke randá Issái dróhagi o dozhmenáni dastá dayagi at.

Issá o Belzabul

²⁰ Randá, Issá lógá átk o ódá mardom haminchok báz at ke Issá o áiay moridán waragay móh ham naraset.

²¹ Wahdé áiay syád o wáres sahig butant, áiay baragá átkant, chéá ke lahténá gwashtagat ke á sár naent.

²² Cha Urshalimá átkagén Sharyatay zánógerán ham anchosh gwashtagat ke Issáyá jenn per o gón jennáni sardár Belzabulay sarókiá, jennána kasshit.

²³ Gorhá Issáyá á lóthetant, mesáli dát o gwashti: “Shaytán, chón Shaytáná kasshet o dar korta kant?

²⁴ Agan yakk molkéá nátepáki bebit, á molk barjáha namánit o

²⁵ agan yakk lógéay mardom watmánwat nátepák bebant, á lóg ham pashta nakapit.

²⁶ Hamé dhawlá, agan Shaytán wati jenday helápá bóshtit, gár o bégwáha bit. É áiay halási ent.

²⁷ Yakk zóráwarén mardoméay lógá hechkasa napoterit o áiay lógá pol o pánch korta nakant, tán wahdé ke hamá zóráwarén mardomá magipt o mabandit. Randá áiay lógá pol o pánch korta kant.

²⁸ Báwar kanét ke mardománi gonáh o kopr bakshag bant,

²⁹ bale hamá ke Hodáay Pákén Ruhay helápá kopra kant, hechbar pahell kanaga nabit o abadi gonahkára mánit.”

³⁰ Issáyá paméshká chosh gwasht ke á gwashagá atant, Issáyá jenné sará ent.

Issáay mát o brát

³¹ Issáay mát o brát átk o dhanná óshtátant, kolaw o paygámesh rawán dát ke Issá áyáni kerrá byayt.

³² Bázén mardomé áiay chapp o chágerdá neshtagat o hálesh dát: “Tai mát o brát dhanná óshtátag o tará lóthant.”

³³ Issáyá áyáni passawá jost kort: “Mani mát o brát kay ant?”

³⁴ Nun Issáyá neshtagén mardománi némagá cháret o gwashti: “Mani mát o brát esh ant!

³⁵ Á ke Hodáay wáhag o razáay sará kára kanant, hamá mani mát o brát o gohár ant.”