Markás 16 - Hodáay Pákén Ketáb Balochi zobáná

Issáay jáh janag

¹ Wahdé Shabbatay róch halás but, Maryam Majdaliah, Ákubay mát Maryam o Sálumahá, washbóén dáru gept ke Issáay jóná charp kanant.

² Yakshambehay bámgwáhá, dém pa Issáay kabrá shotant.

³ Ráhá, watmánwat habar kanagá atant ke “Bárén, kabray dapay dhóká kay pa má léthénit o dura kant?”

⁴ Bale wahdé nazzikk rasetant distesh dhók, ke sakk mazan at, léthénag butag.

⁵ Kabrá ke potertant, distesh ke rástén némagá yakk espétpóshén warnáé neshtag. Cha áiay gendagá, sakk hayrán o habakkah mantant.

⁶ Warnáyá gwasht: “Matorsét, shomá Issá Náseriay shóházá ét ke salib kasshag butag. Á zendag butag, jáhi jatag o edá naent. Bechárét, é hamá jágah ent ke edá áiay jón ér at.

⁷ Nun shomá berawét, Petros o á dega moridán sahig kanét ke Issá cha shomá pésar, Jalilá rawt. Anchosh ke wat shomárá gwashtagati, hamódá áiá gendét.”

⁸ Janén dar átk o cha kabray sará jestant. Á cha torsá larzag o drahagá atant. Paméshká, gón hechkasá habaresh nakort.

Issáay záher bayag

⁹ Yakshambehay sabáhá máhallah, cha wati jáh janagá rand, Issá cha sajjahénán pésar, Maryam Majdaliahay démá paddar but. É hamá Maryam ent ke Issáyá cha áiá hapt jenn kasshetagat.

¹⁰ Á shot o hamáyáná háli dát ke Issáay hamráh butagatant o nun gréwán o mótk árán atant.

¹¹ Bale wahdé áyán é habar eshkot ke Issá zendag butag o Maryamá distag, báwaresh nakort.

¹² Randá, Issá dega shekl o dróshoméá, do moriday démá záher but ke dém pa yakk kallagéá rawagá atant.

¹³ Á, padá átkant o é dega moridesh hál dátant, bale áyán ham báwar nakort.

Issá pa wati yázdahén moridán záhera bit

¹⁴ Randá, Issá wati yázdahén moridáni démá, hamá wahdá átk o záher but ke warák waragá atant. Issáyá, pa áyáni kambáwari o sengdeliá, á mayárig kortant chéá ke á mardománi habaresh báwar nakortagat ke Issáesh cha jáh janagá rand distagat.

¹⁵ Gón áyán gwashti: “Shomá donyáay sajjahén kawmáni kerrá berawét o wasshén mestágá sar kanét.

¹⁶ Harkas ke mani sará báwara kant o pákshódia kant, á rakkit. Bale kasé ke mani sará báwara nakant, mayáriga bit.

¹⁷ Báwarmandán, é nesháni góna bant: mani námay sará, jennán cha mardomána kasshant, nók nókén zobánán habara kanant,

¹⁸ márán pa dasta gerant o agan zahrnákén chizz ham bwarant, áyán hecch parwáha nabit. Gón báwarmandáni dast per moshagá, nádráh wassh o dráha bant.”

Issá ásmáná rawt

¹⁹ Anchosh ke Hodáwandén Issáyá gón áyán wati habar halás kortant, ásmáná barag but o Hodáay rástén némagá nesht.

²⁰ Morid, pa áiay mestágay sheng o tálán kanagá, har molk o shahrá shotant o Hodáwand ham áyáni hamráh at o gón bázén mójezah o ajabbatén neshánián, wati habaráni barhakkii rást o paddar kort.