Markás 13 - Hodáay Pákén Ketáb Balochi zobáná

Áyókén zamánagay bárawá Issáay péshgói

¹ Wahdé Issá cha mazanén parasteshgáhá dar áyagá at, cha moridán yakkéá gón áiá gwasht: “Oo ostád! Bechár chónén dhawldárén seng o dhok ant o chónén shawkén lóg o márhi.”

² Issáyá passaw dát: “É dhawldárén lóg o márhiána genday? Cha eshán yakk sengé ham domi sengay sará namánit, sajjahénána próshant o karójant.”

³ Wahdé Issá mazanén parasteshgáhay dém pa démá Zaytunay kóhay sará neshtagat, Petros, Ákub, Yuhanná o Andriás áiay kerrá átkant o pa halwat o ehwaté jostesh kort:

⁴ “Márá begwash, bárén, é prosht o prósh kadéna bit o eshiay nazzikk bayagay nesháni ché ent?”

⁵ Issáyá habar bongéj kort o gwashtant: “Hozzhár bét, kasé shomárá gomráh makant.

⁶ Bázéné mani námá kayt o gwashit: ‘Man hamá án’ o bázénéá gomráha kant.

⁷ Wahdé jangáni kukkárá eshkonét o áyáni hál o habar shomay góshána kapit, matorsét o paréshán mabét. Allam é dhawlá bit, bale angat halásiay wahd nayátkag.

⁸ Yakk kawmé dega kawméay sará o yakk hokumaté dega hokumatéay sará páda kayt. Bázén molk o jágahán zeminchandha bit o kahta kapit. É, tahná zank o záyagay dardáni bendát ent.

⁹ Hozzhár bét! Shomárá hakdiwánáni démá pésha kanant, kanisaháni tahá janant o pa manigi, hákem o bádsháháni démá óshtárénant. Gorhá shomárá sharrén móhé rasit ke pa man gwáhi bedayét.

¹⁰ Bale pésará báyad ent ke mani wasshén mestág pa sajjahén kawmán jár janag bebit.

¹¹ Harwahd ke shomárá gerant o hakdiwánána barant, cha péshá paréshán mabét ke ‘má ché begwashén.’ Á wahdá, har chizzé ke shomárá sój dayaga bit, hamáiá begwashét. Chéá ke gwashók shomá naét, Hodáay Pákén Ruh ent.

¹² Brát wati brátá dróhit o kóshárénit o pet wati chokká, chokk cha wati pet o mátá yágia bant o áyána kóshárénant.

¹³ Sajjahén mardom, pa mani námaygi cha shomá naprata kanant. Bale hamá ke tán áherá sakkiána saggit, á rakkit.

Torsnákén wahd o jáwar

¹⁴ Wahdé shomá á ‘palit o bérán kanókén bazzhnáká’ hamá jágahá gendét ke áiay jágah naent,” wánók bezánt o sharr sarpad bebit, “hamá ke Yahudiahá ant dém pa kóhán betachant.

¹⁵ Á ke bán o bádgiray sará ent pa chizzéay zuragá jahlá ér makapit o lógá marawt o

¹⁶ á ke dhagáráni sará kesht o keshárá ent, wati kabáhay zuragá per matarrit.

¹⁷ Á róchán, apsóz pa lápporr o chokmátén janénán.

¹⁸ Dwá bekanét ke é chizz zemestáná mabit.

¹⁹ Chéá ke hamá róchán, anchén sakki o sórié kapit ke áiay mesál, cha hamá róchá ke Hodáyá jahán jórhéntag tán é wahdá nayátkag o hechbar ham nayayt.

²⁰ Agan Hodáwandá á sakkiáni róch kamter makorténant, hecch mardomé narakketagat. Bale pa wati gechén kortagénáni háterá, á róchi kamter kortagant.

²¹ Á wahdá, agan kasé shomárá begwashit: ‘Bechár, Masih edá ent’ yá ‘bechár, ódá ent,’ báwar makanét.

²² Chéá ke drógén masih o drógén nabi jáha janant o nesháni o ajekkái pésha dárant. Wati sajjahén zórá janant ke gechén kortagénán ham gomráh bekanant.

²³ Nun sharr hósh o sár kanét, chéá ke é sajjahén jáwaráni bayagá pésar man shomárá hál dátag.

Issáay per tarrag

²⁴ Á róchán, cha é sakki o sórián o rand, róch tahára bit, máha nadrapshit o máhekánia nabit,

²⁵ estár ham cha ásmáná kapant o ásmáni zór o wák larzénaga bant.

²⁶ Á wahdá, mardom Ensánay Chokká gendant, ke gón mazanén wák o twán o shán o shawkaté cha jambaráni nyámá kayt.

²⁷ Gorhá préshtagán ráha dant o cha chárén gwátán, bezán cha zeminay hand o damagán tán ásmánay goddhi marz o simsarán, wati gechén kortagén mardomán yakjáha kant.

²⁸ Nun cha enjiray drachká dars o sabakk begerét. Anchosh ke áiay thál narma bant o táka trokkant, gorhá zánét ke garmágay mósom nazzikk ent.

²⁹ Hamé dhawlá, wahdé é chizzána gendét, wata zánét ke mani áyagay wahd nazzikk ent o darwázagay dapá rasetagán.

³⁰ Shomárá rásténa gwashán, tán é sajjahén jáwar mayáyant é nasl o padréch halása nabit.

³¹ Zemin o ásmán gára bant, bale mani habar hechbar gár o zyána nabant.

³² Hechkasa nazánt ke á róch o á sáhat kadéna rasit, na ásmánay préshtaga zánant o na chokk, Peta zánt o bass.

³³ Tayár o hozzhár bét! Chéá ke nazánét á wahd o damán kadéna kayt.

³⁴ Mani per tarragay mesál, hamé dhawlá ent ke mardé dur o drájén saparéá berawt, roksat kanagay wahdá, sajjahén hezmatkáráni kár o bárán sar o sój bekant o negahpáná hokm bedant: ‘Sár o hozzhár bay!’

³⁵ Shomá nazánét ke lógay hodábond kojám róch o che wahdá kayt; bégáhá, shapnémá, bámgwáhá yá sabáhay wahdá? Paméshká sár o hozzhár bét.

³⁶ Chosh mabit ke hodábond anágat byayt o begendit ke shomá wáb ét.

³⁷ Anchosh ke man shomárá gwashagá án, sajjahénána gwashán: Hozzhár bét!”