Markás 12 - Hodáay Pákén Ketáb Balochi zobáná

Badén bágpánáni mesál

¹ Issáyá, randá gón mesál o darwar wati habar gón áyán bongéj kort o gwashti: “Mardéá anguri bágé addh kort. Áiay chapp o chágerdá pall o pasili bast, pa anguráni shiragay geragá kall o kombé jórhi kort o pa negahpániá yakk borjé ham basti. Randá bági pa konandahkári o zamán lahtén bágpánay dastá dát o wat saparéá shot.

² Wahdé anguray mósom but, áiá hezmatkáré zamánzurén bágpánáni kerrá ráh dát tán cha bágá kammé nibag byárit,

³ bale bágpánán é hezmatkár latth o kotth kort o gón hórk o háligén dastán per tarrént.

⁴ Gorhá, hodábondá dega hezmatkáré dém dát. Áyán, áiay sar ham prósht o béezzat kort.

⁵ Padá dega hezmatkáré rawáni dát o bágpánán á ham jat o kosht. Hamé dhawlá, áiá dega bázén hezmatkáré ráh dát, bale bágpánán lahtén jat o lahtén kosht.

⁶ Nun pa ráh dayagá áiay kerrá yakk kasé pasht kaptagat, áiay dóstén mardénchokk. Godhsará, wati hamá chokki rawán dát, hayáli kort balkén áiay ruá bedárant.

⁷ Bale bágpánán watmánwatá gwasht: ‘Bágay mirásdár hamesh ent, byáét eshiá ham koshén, tánke melk o mirás may bebant.’

⁸ Gorhá gept o koshtesh o jónesh cha bágá dhann, dawr dát.”

⁹ Issáyá jost kort: “Nun shomay gománá bágay hodábond ché kant? Á kayt, bágpánána koshit o bágá dega bágpánáni dastá dant.

¹⁰ Záná, shomá Pákén Ketábá nawántag: Á seng ke bánbandén ostáyán pasond nakort o nazort hamá seng, bonhesht but.

¹¹ É Hodáwanday kár ent o may chammán ajab ent.”

¹² Nun áyán lóthet Issáyá dazgir bekanant, chéá ke zántesh Issáyá é mesál hamáyáni bárawá áwortag, bale cha mardomána torsetesh. Gorhá Issáesh esht o shotant.

Máliátay bárawá

¹³ Randá, áyán lahtén Parisi o Hirudi Issáay kerrá rawán dát tán áiá cha áiay jenday habarán mán begisshénant.

¹⁴ Nun átk o jostesh kort: Oo ostád! Má zánén ke taw tachk o rástén mardomé ay o harché gwashay pa rástiá gwashay o hechkaséay némagá nageray, chéá ke sajjahénán pa yakk chamméá cháray o gón rásti o delsetki Hodáay ráhá sója dayay. Bárén, Rumay bádsháh Kaysará, song o máliát dayag rawá ent yá na? Má áiá máliát bedayén yá madayén?

¹⁵ Issáyá áyáni é dotal o dopósti zánt o gwashti: “Chéá maná chakkásagá ét? Yakk dináré byárét tán bechárán.”

¹⁶ Áyán dináré áwort. Josti kort: “Eshiay sará kai nám o naksh per ent?” Áyán passaw dát: “Kaysaray.”

¹⁷ Nun Issáyá gwasht: “Gorhá Kaysaraygá Kaysará bedayét o Hodáaygá Hodáyá bedayét.” Cha é passawá, á hayrán o habakkah mantant.

Áherat o sáng o sur

^18-19 Randá, lahtén Saduki, ke áheratay namannók ant, Issáay kerrá átk o jostesh kort: “Oo ostád! Mussáyá pa má nebeshtag: Agan kaséay sur kortagén bráté bé chokká bemerit o janózámi zendag bebit, gorhá áiay brát báyad ent gón á janózámá sur bekant tánke chokk o rand o ráhé pa wati brátá bellit.

²⁰ É dhawlá, hapt brát atant. Awali brátá jané gept o bé chokká mort,

²¹ gorhá domi brátá gón á janózámá sur kort, bale á ham bé chokká mort. Sayomi brát ham, hamé dhawlá.

²² Cha haptén brátán hechkasá pa wat rand o ráhé naesht. Godhsará, á janén ham mort.

²³ Nun taw begwash, áheratay róchá é janén kojám brátayga bit? Chéá ke har haptén brátán bárig bárigá gón áiá sur kortagat.”

²⁴ Issáyá gwasht: “Shomá gomráh naét? Parchá ke na cha Pákén Ketábán chizzé sarkecha warét o na Hodáay wák o zórá sarpada bét.

²⁵ Mordag ke jáha janant, na sura kanant o na sur dayaga bant, ásmáni préshtagáni dhawlá bant.

²⁶ Mordagáni padá zendag bayag o jáh janagay bárawá, záná shomá Mussáay ketábá bon geptagén dhólokay kessah nawántag, ke Hodáyá gón Mussáyá chón habar kort? ‘Man án, Ebráhémay Hodá, Esákay Hodá o Ákubay Hodá.’

²⁷ Bezán á, mordagáni Hodá naent, zendagénáni Hodá ent. Shomá báz rad wártag.”

Masterén hokm

²⁸ Cha Sharyatay zánógerán yakké, áyáni é habarán gósh dáragá at o áiá máret ke Issá sharr passaw dayagá ent, nazzikká átk o josti kort: “Sharyatay masterén hokm kojám ent?”

²⁹ Issáyá passaw dát: “Sharyatay masterén hokm esh ent: ‘Oo Esráil! Gósh dár: Hodáwand, may Hodá, yektáén Hodá ent,

³⁰ wati Hodáwandén Hodáyá, pa del, gón sajjahén ján o sáh, gón sajjahén pahm o pegr o gón sajjahén was o wáká dóst bedár.’

³¹ Domi hokm esh ent: ‘Gón wati hamsáhegá wati jenday paymá mehr bekan.’ Cha é doénán, dega masterén hokm nést.”

³² Gorhá, Sharyatay zánógerá gwasht: “Oo ostád! Taw sakk rást o sharr gwasht, pa rásti ke Hodá yakké o abéd cha áiá, Hodáé nést.

³³ Áiá pa del, gón sajjahén pahm o pegr o sarjamén was o wáká dóst dárag o hamsáhegá wati jenday paymá mehr kanag cha sajjahén hayrátién sóchagi tohpah o sajjahén korbánigán sharter ent.”

³⁴ Wahdé Issáyá dist áiá dánáén passawé dát, gwashti: “Taw cha Hodáay bádsháhiá dur naay.” Cha ed o rand, hechkasá del nakort cha Issáyá chizzé jost bekant.

Masih kai chokk ent?

³⁵ Wahdé Issáyá, mazanén parasteshgáhá tálima dát, josti kort ke “Sharyatay zánóger che paymá gwashant Masih Dáud bádsháhay chokk ent?

³⁶ Dáudá wat cha Hodáay Pákén Ruhay shobén o elhámá gwashtag: Hodáwandá gón mani Hodáwandá gwasht mani rástén némagá benend tán hamá wahdá ke tai dozhmenán tai pádáni chérá dawr bedayán.

³⁷ Agan Dáuday jend, Masihá wati Hodáwanda gwashit, gorhá á chón Dáuday chokk buta kant?” Mardománi mocchiá gón wasshi o shádehi, Issáay habar gósha dásht.

Issá Sharyatay zánógerán páshka kant

³⁸ Padá, Issáyá wati tálimáni tahá gwasht: “Cha Sharyatay zánógerán hozzhár bét ke áyán, drájén jámag o kabáh gwará kanag dósta bit o bázáráni tarr o gardá, cha mardomán wasshátk o drahbáta lóthant.

³⁹ Kanisaháni sharterén jáhán gechéna kanant o mehmánián, awali reday nendagesh pasond ent.

⁴⁰ Janózámáni lógán gón málwáriá barant o pa pésh dáragá wati dwá o sanáyán drájkassha kanant. Eshán sakterén sezá o padmozza rasit.”

Janózáméay pákwandhi hayrát

⁴¹ Issá, mazanén parasteshgáhay hayrátáni pétiay dém pa démá neshtagat o hamá mardomán cháragá at ke é pétiá zarresh dawra dát. Cha zardárán bázénéá, zyádahén zarré ér kort.

⁴² Gorhá, garib o béwasén janózámé átk o do paysahi pétiá mán kort.

⁴³ Nun Issáyá morid wati kerrá lóthetant o gwashti: “Shomárá rásténa gwashán, é béwasén janózámá cha á sajjahénán géshter zarr pétiá mán kort.

⁴⁴ Chéá ke á degarán cha wati géshén málá chizzoké dát, bale é janózámá, gón wati nézgári o garibiá, harché ke áiá hastat dáti, bezán wati sajjahén bonmál.”