Luká 21 - Hodáay Pákén Ketáb Balochi zobáná

Janózáméay hayrát

¹ Issáyá sar borz kort o disti ke lahtén hazgár o hastómand, wati hayráti zarrán mazanén parasteshgáhay pétiá mán kanagá ent.

² Áiá, yakk nézgárén janózámé ham dist ke pétiay tahá do paysahi dawr dát.

³ Nun gwashti: “Shomárá rásténa gwashán, é béwasén janózámá cha sajjahénán géshter mán kort.

⁴ Chéá ke á degarán cha wati géshén málá chizzoké dát, bale é janózámá, gón wati nézgári o garibiá, harché ke áiá hastat dáti, bezán wati sajjahén bonmál.”

Áyókén zamánagay bárawá Issáay péshgói

⁵ Lahtén mardom mazanén parasteshgáhay bárawá habar kanag o gwashagá at ke “É gón chónén dhawldárén seng o gránkimmatén hayrát o thékián nakshband kanag butag.”

⁶ Á wahdi Issáyá gwasht: “Cha eshán ke shomá maróchi gendagá ét, róché kayt ke yakk sengé ham domi sengay sará namánit. Sajjahénána próshant o karójant.”

⁷ Jostesh gept: “Oo ostád! Bárén, é prosht o prósh kadéna bit o eshiay nazzikk bayagay nesháni ché ent?”

⁸ Issáyá gwasht: “Hozzhár bét, kasé shomárá gomráh makant. Chéá ke bázéné pa mani námá kayt o gwashit: ‘Man hamá án’ o ‘Wahd átkag o nazzikk ent,’ bale shomá áyáni habará gón makapét.

⁹ Wahdé shomá jang o áshópay kukkárá eshkonét, matorsét o paréshán mabét. Chéá ke awalá báyad ent é dhawlá bebit, bale halásiay wahd hamá damáná pa sara narasit.”

¹⁰ Gorhá gón áyán gwashti: “Yakk kawmé dega kawméay sará o yakk hokumaté dega hokumatéay sará páda kayt.

¹¹ Mazanén zeminchandha bit o bázén jágahán dhokkál o wabá kapit. Cha ásmáná torsnákén sargwast o ajabbatén nesháni paddara bit.

¹² Bale cha é sajjahénán o pésar, shomárá gerant o pa shomá jawr o ázára kanant, kanisah o jélána barant o bandiga kanant. Pa mani námay sawabá bádsháh o hákemáni démá barant o pésha kanant.

¹³ Gorhá shomárá pa gwáhi dayagá sharrén móhé rasit.

¹⁴ Gón wat shawr kanét ke pa wati démpániá, cha wahdá pésar paréshán mabét.

¹⁵ Chéá ke man shomárá anchén habaráni zántkáriá dayán ke hecch dozhmené shomay démá maóshtit o shomay habarán prósht makant.

¹⁶ Tantaná shomay mát o pet, brát o syád o dóst, shomárá geráénant o lahténá kóshárénant.

¹⁷ Sajjahén mardom pa mani námay sawabá cha shomá naprata kanant,

¹⁸ bale cha shomay sará yakk mudé ham kamma nabit.

¹⁹ Agan pa deléri sakkián besaggét, wati sáhá rakkénét.

Urshalimay harábi o wayrániay péshgói

²⁰ Wahdé shomá gendét ke Urshalim, pawj o lashkará chapp o chágerdá angerr kortag, gorhá bezánét ke eshiay wayrániay wahd nazzikk ent.

²¹ Á wahdá hamá ke Yahudiahá ant, kóhán betachant, á ke Urshalimá ant dhanná dar bekapant o á ke cha shahrá dhann ant shahrá marawant.

²² Chéá ke á wahd sezáay wahda bit o sajjahén nebeshtánkáni habar purah o sarjama bant.

²³ Á róchán, apsóz pa lápporr o chokmátén janénán, chéá ke molkay sará báz sakki o janjála kayt o é kawmay sará Hodáay kahra kapit.

²⁴ Dozhmen áyán zahmáni dapá dayant o bázénéá bandig o sajjahén donyáay tahá darándhéha kanant. Urshalim, darkawmáni pádáni lagatmála bit, tán á wahdá ke darkawmáni wahd o báriga kotthit o halása bit.

Issáay per tarrag

²⁵ Cha róch o máh o estárán ajabbatén nesháni paddara bant o donyáay sajjahén kawm cha daryáay chawl o mawjáni trondén tawárá paréshán o sargardána bant.

²⁶ Mardom, donyáay sará áyókén janjál o sakki o sóriáni tors o bimmá béhósha bant, chéá ke ásmánay zór o wák larzénaga bant.

²⁷ Á wahdá, mardom Ensánay Chokká gendant, ke gón mazanén wák o twán o shán o shawkaté cha jambaréay nyámá kayt o paddara bit.

²⁸ Wahdé é jáwara káyant o rasant, gorhá wati sará borz kanét o tachkátachk bóshtét ke shomay rakkénagay wahd nazzikk ent.”

Enjiray drachk

²⁹ Issáyá pa áyán é mesál ham dát ke “Enjir o é dega drachkán bechárét,

³⁰ anchosh ke tákesh jat, wata zánét ke nun garmágay mósom nazzikk ent.

³¹ Hamé paymá, wahdé é chizzána gendét, wata zánét ke Hodáay bádsháhi nazzikk ent.

³² Shomárá rásténa gwashán, tán é sajjahén jáwar mayáyant, é nasl o padréch halása nabit.

³³ Zemin o ásmán gára bant, bale mani habar hechbar gár o zyána nabant.

³⁴ Hozzhár bét, chosh mabit ke shomay del pa neshah o malárán berawt o zenday pegr o andóh shomay delá gránbár bekant o á róch anágat shomay gotthá lóp bebit.

³⁵ Chéá ke á róch pa donyáay sajjahén mardomána kayt.

³⁶ Paméshká harwahd hozzhár bét o dwá bekanét, tán shomárá á róchá ke chosha bit o é jáwar pa sara rasant dar rawagay wák bebit o Ensánay Chokkay bárgáhá óshtát bekanét.”

³⁷ Issáyá har róch, mazanén parasteshgáhá sabakk o tálima dát. Har shap cha shahrá dhann, Zaytun námkaptén kóhay sará shot o wati shapi sabáha kort.

³⁸ Mardom ham har sabáhá máhallah, pa áiay habaráni gósh dáragá, mazanén parasteshgáhá átkant.