Luká 15 - Hodáay Pákén Ketáb Balochi zobáná

Gárén mésh

¹ Nun sajjahén songi o máliátgir o gonahkárén mardom, Issáay gwará átkant tán áiay habarán beshkonant.

² Bale Parisi o Sharyatay zánóger, norondhán o iráz geráná gwashagá atant: “É mard gón gonahkárán nend o nyáda kant o gón áyán hór waraga wárt.”

³ Gorhá Issáyá pa áyán é mesál áwort o gwashti:

⁴ “Cha shomá agan kaséá sad mésh bebit o cha áyán yakké gár bebit, gorhá nawad o nohén méshán charágáhá yalaha nadant o hamá gárén méshay shóházá narawt tán áiá dar begéjit?

⁵ Wahdé gárén méshá dara géjit pa galé wati kópagá kanti,

⁶ lógá rawt, dóst o hamsáhegána lóthit o gwashit: ‘Gón man gal o shádehi kanét ke man wati á gárén mésh dar gétkag.’

⁷ Man shomárá gwashán, hamé dhawlá pa yakk pashómánén gonahkáréá ásmáná mazanén jashné geraga bit, bale pa nawad o noh pahrézkárá ke áyán pashómáni darkár naent choshén jashné geraga nabit.

Gárén kaldár

⁸ Yá ke agan janénéá dah kaldár bebit o cha á dahén kaldárán yakké gár bebit, gorhá pa wati gárén kaldáray shóházá, cherág róka nakant o lógá narópit? Tán áiá dar magéjit cha wati shóházá dasta kasshit?

⁹ Anchosh ke á kaldárá dara géjit, dóst o hamsáhegána lóthit o gwashit: ‘Gón man gal o shádehi kanét chéá ke wati gárén kaldáron wadi kortag.’

¹⁰ Hamé paymá man shomárá gwashán, agan yakk gonahkáré cha wati gonáhán tawbah bekant o Hodáay ráhá byayt, Hodáay préshtagáni bárgáhá jashn o shádehi geraga bit.”

Gár o gomráhén bacch

¹¹ Issáyá gésh kanán kort o gwashti: “Yakk mardéá do mardénchokk hastat.

¹² Kasteréná yakk róché gón petá gwasht: ‘Oo mani pet! Cha tai mál o melkatá, harché ke mani bahr o wandhá kapit maná annun beday.’ Gorhá petá wati sajjahén mál o maddhi doén chokkáni sará bahr kort.

^13-14 Lahtén róchá o rand, kasterén chokká wati sajjahén bahr yakjáh kort, zort o durén molkéá shot o sajjahén zarri pa hawasnáki gár kortant. Randá, á molká sakk dhokkál kapt o á dastang o mohtáj but.

¹⁵ Hamá molká, yakk mardoméay kerrá shot o pa káréay geragá watá lecchénti. Gorhá, áiá wati dhagáráni sará hukkáni chárénók kort.

¹⁶ Ódá haminchok shodig but ke delia lóthet hamá kósagán bwárt o wati lápá sér bekant ke hukkáni warák atant, bale kassá pa waragá hecch nadát.

¹⁷ Wahdé hóshi kort o zánti, gón wat gwashti: ‘Mani petay bázén nawkar o kárdárá lápay sérá waráka rasit o man edá shodá mark án.

¹⁸ Nun wati petay kerrá pera tarrán o áiá gwashán: Oo mani pet! Man tai o ásmánay Hodáay gonahkár án o

¹⁹ nuna nakarzán ke tai chokk gwashag bebán. Maná wati hezmatkáráni dhawlá yakk hezmatkáré bekan.’

²⁰ Gorhá pád átk o dém pa petay lógá rahádag but. Petá ke cha durá dist deli pa áiá sotk o pa eshtápi áiay démá tachán but o gwarambázi kort o chokketi.

²¹ Chokká gwasht: ‘Oo mani pet! Man tai o ásmánay Hodáay gonahkár án o nuna nakarzán ke tai chokk gwashag bebán.’

²² Bale petá wati hezmatkár gwashtant: ‘Eshtáp kanét, pa áiá gehterén kabáhá byárét o gwarái bedayét. Challah o mondrikki dastá o kawshi pádá bedayét.

²³ Á pábondi gwaská byárét o bekoshét tánke jashné bekanén o wasshén waráké bwarén.

²⁴ Chéá ke mani é chokk mortagat bale nun padá zendag butag, gár at o nun wadi butag. É dhawlá áyán gal o shádehi kort.’

²⁵ Bale masterén chokk dhagáráni sará at. Wahdé lógay nazzikká raset o sáz o zémeli tawári eshkot,

²⁶ cha hezmatkárán yakké lóthet o josti kort: ‘Edá ché bayagá ent?’

²⁷ Hezmatkárá passaw dát: ‘Tai brát padá lógá átkag o nun ke á pa wasshi o salámati rasetag tai petá jashné geptag o á pábondi gwaski koshtag.’

²⁸ Gorhá, masterén brát sakk zahr gept o nalótheti lógá berawt. Bale pet dhanná átk o áiay wasshán kanagá mennatwár but.

²⁹ Chokká petay mennatgiriay passawá gwasht: ‘Wati delá bechár, man inchok sálá tai kerrá goláméay dhawlá kár kortag, hechbar cha tai hokmá dar nabutagán o taw maná yakk shenekké ham nadátag ke gón wati dóst o hambalán shádehi bekanán.

³⁰ Bale tai é chokká tai mál gón kahbagén janénán gár o gárat kortag o taw pa áiay per tarragá pábondi gwask koshtag.’

³¹ Petá gwasht: ‘Oo mani chokk! Taw harwahd mani kerrá ay o harché ke maná hast á sajjahén taig ant,

³² bale annun márá paméshká jashn o shádehi kanagi ent ke tai é brát mortagat o nun zendag butag, gár o bégwáh at o nun wadi butag o átkag.’”