Songs 99 - Hawaii Pidgin Bible

God Da King Dat Stay Good An Spesho

¹ Da One In Charge, he da king! Az why all da peopos Stay sked an shaking! He get his throne Above da awesome angel watcha guys. Az why da groun shake too.

² Da One In Charge, he da importan one On top Zion Hill, Jerusalem town. He mo importan Den all da diffren peopos.

³ Good, all da peopos tell, “You, da mos importan one! You awesome!” Cuz dey know wat kine god him, An dey get choke respeck fo him. Da One In Charge, he good an spesho.

⁴ Eh God! You da strong king. You get love an aloha Fo whoeva do da right ting! You da One dat tell Wass da bestes way fo da Israel peopo An you set up da rules fo dem, How fo do wass right.

⁵ Dass why I tell, “Tell erybody Dat oua God, Dass Da One In Charge a us, He da greates! Bow down in front him, Wea he sit on top his throne! Cuz Da One In Charge, He good an spesho!”

⁶ Moses an Aaron, dey was pries guys Dat work fo God. Samuel too, he was one a dem guys Dat wen tell God fo help um Cuz dey know who him. All dem guys, wen dey yell To Da One In Charge fo help um, Da One In Charge lissen dem An help um.

⁷ He talk to dem outa da cloud Dat go from da groun to da sky. Dey wen make shua dey do Wateva Da One In Charge Tell um fo do— Da tings he tell dey suppose to do.

⁸ An you, oua God, You Da One In Charge a us! You wen do wat yoa peopo tell you fo do! Wen dey jam up, you da kine God Dat wen let um go. But same time, you wen punish dem Fo da bad tings dey do.

⁹ All you peopo, tell erybody dat oua God, Dass Da One In Charge a us, He da greates! Go down in front him, On top da hill dat stay spesho fo him, Cuz oua God, Da One In Charge a us, He good an spesho!