Songs 98 - Hawaii Pidgin BibleGod Stay In Charge A Da World ( Jesus Guys 17:31 ) One Song Fo Da One In Charge. 1 Sing one new song fo Da One In Charge, Cuz he wen do awesome tings! He da winna, Cuz he get plenny powa, An he no need nobody fo help him, Cuz he spesho! 2 Da One In Charge, he show erybody Dat he da winna! He show all da diffren peopos Dat he erytime do wass right. 3 Da One In Charge, he no foget Fo stay tight wit da Israel ohana, An dey can trus him fo do Wat he tell he goin do. Dass why da peopos From da mos far parts a da world Know dat oua God Get his Israel peopo outa trouble! 4 Eh! You peopos all ova da world! Make big noise fo Da One In Charge! Open yoa mout an yell Cuz you stay good inside, an sing! 5 Sing to Da One In Charge Wit da small kine harp! Use yoa harp fo sing songs! 6 Blow da metal trumpets, An make noise Wit da sheep horn trumpets, In front oua king, Da One In Charge! 7 Same ting, I like fo da ocean An eryting dat get inside um Make plenny noise fo Da One In Charge, Jalike wen get one storm! I like da world An all da peopo dat stay live dea Make big noise fo him too! 8 I like da rivas make noise Jalike dey clap fo him! I like da mountains yell Cuz dey stay good inside, 9 Cuz all dem stay In front Da One In Charge! Fo shua he stay coming fo be da judge Fo erybody inside da world. He goin judge da world da right way, An he no goin make Diffren kine to diffren peopos! |