Songs 97 - Hawaii Pidgin Bible

God Win

¹ Da One In Charge, he da king! I like erybody inside da world Stay good inside cuz a dat! I even like all da islans Go dance an sing!

² Us guys no can see Wat Da One In Charge stay do, Cuz heavy an dark, Da clouds all aroun him! Us know he goin stay da king foeva, Cuz he do wass right erytime, An he judge da right way erytime.

³ Get fire dat go in front him An burn up all da ones aroun him Dat stay agains him.

⁴ Weneva he make lightning Light up da world! Da world see wass happening An shake plenny.

⁵ Wen Da One In Charge show up, Da mountains melt in front him Jalike wax. Cuz he da boss fo da whole world.

⁶ Da sky show dat he stay do Da right ting erytime, All da diffren peopos see How awesome Da One In Charge stay.

⁷ All da ones dat get Idol kine gods fo dea boss, Goin come shame! All da ones dat stay talk big Bout dea idol kine statues, Same ting! Eh, all you gods! Put yoa face on top da groun Fo show respeck fo da God dass fo real!

⁸ Da One In Charge, wen you judge peopo, You judge um da right way erytime. Az why da peopo dat live Mount Zion Hear bout Da One In Charge, An stay good inside. Same ting fo da peopo Dat live in da odda towns All ova da Judah land!

⁹ Cuz you, Da One In Charge, You da mos importan one In da whole world! Erybody know, you mo importan Den all da odda gods!

¹⁰ You guys dat get love an aloha Fo Da One In Charge, Good, you stay hate Da bad tings peopo do, Cuz Da One In Charge take kea Da ones dat stay tight wit him. He get um outa trouble Wen da bad guys come afta dem.

¹¹ God do good tings Fo da peopo dat get um right wit him, God make um shine bright. Da peopo dat do wass right, God make um stay real good inside.

¹² All you peopo dat do wass right erytime, You can stay good inside Cuz a wat Da One In Charge stay do! Go tell dat he da greates, Cuz he stay good an spesho!