Songs 95 - Hawaii Pidgin Bible

You Talk Good Bout God, You Do Wat He Tell You Fo Do

¹ Eh! Us guys yell to Da One In Charge, Cuz us stay good inside! Us goin make big noise Fo da One dat stay strong Jalike he one big rock, Da One dat get us guys outa trouble!

² We go da Temple fo meet him An tell him “Mahalo plenny!” Fo make big noise fo him wen we sing!

³ Cuz Da One In Charge, Him da God dass fo real! Him da awesome King dat get da powa Ova all da odda gods.

⁴ From unda da ocean To da top a da mountain, Da One In Charge stay in charge.

⁵ Da ocean, he own um, cuz he wen make um. Da dry land, he own dat too, Cuz he da one wen put um togedda.

⁶ Eh come! We go down In front Da One In Charge, We go down in front da One Dat wen make us guys.

⁷ Cuz him, he oua God. Us guys, us da peopo he take kea of, Jalike us guys da sheeps, An him da sheep guy. Dis wat I like fo you guys do today, Lissen wat God tell you guys!

God Talk To Da Peopo

⁸ God tell, “Eh! No be hard head, Jalike befo time Wen yoa ancesta guys wen stay Inside da boonies, Dis da place dey call Meribah, Cuz yoa ancesta guys wen fight me, Dey call dat same place Massah too, Cuz yoa ancesta guys Wen tes me ova dea.

⁹ Dat time, Yoa ancesta guys challenge me Fo find out how I stay fo real kine. Neva mind dey awready see plenny Wat I do.

¹⁰ “Was forty year yoa ancesta guys Was pilau fo me, An cuz a dat I mad! Dis how I wen tink: ‘Dese peopo! Inside, dey like do Wat dey like do! Dey donno how fo do tings my way!’

¹¹ Cuz a dem, I wen come huhu An make one strong promise— I wen tell, ‘No way dese peopo goin go Da place wea I goin make dem come So notting bodda dem!’ ” An dass wat God tell you guys today.