Songs 94 - Hawaii Pidgin Bible

God Da Judge Fo Erybody

¹ Eh! You Da One In Charge! You da kine God dat get peopo back Fo da way dey jam up eryting! Fo erybody see how you get back Da ones dat tink fo do any kine!

² You da one stay da judge Fo da peopo all ova da world, So pay back da peopo dat tink Dey mo betta den all da odda peopo, Fo wat dey wen do.

³ Eh! You Da One In Charge! Da peopo dat stay do bad tings, How long dey goin make tantaran Weneva dey do someting bad?

⁴ Da tings dey tell cuz dey tink dey big Come out plenny from dea mout, An no bodda dem! All dem crooked guys stay talk big Bout da bad tings dey do.

⁵ Eh! You Da One In Charge! Dey stay smash yoa peopo! Dey give da peopo dat you own Hard time!

⁶ Dey kill widows An peopo from anodda place. Dey wipe out da kids Dat no mo faddah o muddah.

⁷ An dey tell, “Da One In Charge, he no see notting! Da God Jacob wen pray to, He no undastan wat stay happen!”

⁸ You guys from oua peopo Israel Dat donno how fo tink notting, Mo betta you undastan! You peopo dat do stupid kine stuff, No good you neva learn wat fo do!

⁹ Da one dat wen give you ears, You tink he no can hear?! Da one dat wen make yoa eye, You tink he no can see?!

¹⁰ Da one dat stay punish da nations— You tink he no goin punish You guys too?! Da one dat stay teach peopo eryting— You tink he donno wat you guys do?!

¹¹ Da One In Charge, He know how peopo tink. He know wat dey tink bout, Ony wase time.

¹² Eh! Da One In Charge, Da peopo you tell um wen dey wrong Fo help um learn stuff, Da ones you teach from yoa Rules, Dey can stay good inside!

¹³ Da stuff you teach dem, Make um so notting bodda dem Erytime dey get trouble, An you goin do all dis, Till da bad guys go down Inside one deep hole.

¹⁴ Cuz Da One In Charge No goin dump his peopo. He no goin go way From da ones dat stay his.

¹⁵ Den bumbye, da judge guys Goin judge da right way, An cuz a dat, All da peopo dat stay pono inside, Dey goin do eryting da right way too.

¹⁶ You tink get somebody stan up Fo help me Wen da bad guys Come afta me, o wat?! You tink somebody hang in dea wit me Agains da peopo Dat stay do bad tings, o wat?! No way!

¹⁷ If Da One In Charge neva help me, I litto mo mahke An go da place wea nobody talk.

¹⁸ Weneva I tink, “I no can stan up!” You stay right dea, Da One In Charge, An you no let me fall down!

¹⁹ Wen I tink bout tings Dat bodda me plenny, You make me feel shua Notting bad goin happen. Cuz a dat, I stay feel real good inside!

²⁰ Da king guys dat stay wipe out peopo An make rules dat tell Az okay fo make any kine. You tink dey can work Wit you, o wat?! No way!

²¹ Dat kine peopo come togedda Fo kill da peopo dat do da right ting. Dea judges tell, Da peopo dat neva do notting bad Gotta bleed an mahke.

²² You know wat? Da One In Charge Wen come da One dat take kea me, Jalike one strong wall wea I can hide, Jalike one big rock Wea nobody can hurt me.

²³ Da One In Charge, he goin get um back Fo da way dey jam up eryting. He goin wipe dem out Fo da bad tings dey wen do. Az oua God, Dass Da One In Charge a us, Goin wipe dem out!