Songs 93 - Hawaii Pidgin Bible

God Da King

¹ Da One In Charge, he da king! He stay awesome an strong Jalike he wear king kine robes! He wen put da world in da right place, An no mo notting can shake up Da world from dea!

² Eh! You Da One In Charge! From da time you make da world, You get da right fo be king! You stay from befo dat time!

³ You Da One In Charge! Da ocean make plenny noise! Da ocean stay poun plenny!

⁴ But you, Da One In Charge, You mo awesome an importan Still yet! Mo awesome den da noise From da big watta, Mo awesome den da surf Inside da ocean!

⁵ Da Rules you give us guys, Can trus um cuz stay true. Yoa Temple stay how suppose to be, Cuz eryting dea stay spesho fo you, Da One In Charge, foeva.