Songs 92 - Hawaii Pidgin Bible

Song Fo Da Res Day

Song Fo God, fo sing um on da Res Day

¹ Good, fo tell erybody Dat you da greates, Da One In Charge! Good, fo make music Fo erybody know who you, Da God Dass Mo Importan Den All Da Odda Gods!

² Morning time, I stay tell How you stay tight wit yoa peopo! Nite time, I stay tell How I trus you erytime!

³ I stay play da ten-string harp An da twelve-string harp, I stay play da small harp Fo help me tink plenny bout you.

⁴ Cuz Da One In Charge, You make me stay good inside Cuz a da tings you do awready. I like sing real loud cuz I feel real good, Erytime I tink bout da tings you do Cuz a yoa powa.

⁵ Eh! Da One In Charge, All da kine tings you do Stay awesome to da max! An gotta tink plenny fo undastan All da tings you make plan fo do!

⁶ But fo da kine peopo Dat donno how fo tink good, Get stuff dey no goin know. Da dumb buggahs dat tink Dey no need learn notting, Dey no can undastan Wat I goin tell now.

⁷ Dis wat dey no undastan: No matta da bad kine peopo come up All ova da place jalike grass, An all da bad guys Dat stay do wass wrong Look good, Jalike wen da flowas come out, God goin wipe um out, An dey goin stay wipe out foeva!

⁸ But you, you Da One In Charge, An you stay Da mos importan one foeva!

⁹ Dis fo shua: Da peopo dat stay agains you, Da One In Charge, Dey goin come mahke die dead! Da ones dat stay do wass wrong, Dey goin run away all ova da place!

¹⁰ You wen make me come real strong, Jalike da big wild bulls. You give me one haku lei fo my head, Fo show you get aloha fo me.

¹¹ I see awready wat wen happen To da guys dat stay agains me. I hear awready wat wen happen To da bad peopo dat come fo fight me.

¹² Da peopo dat stay do wass right, Dey goin come up all ova da place Jalike da palm trees. Dey goin grow an come big Jalike da cedar trees Lebanon side.

¹³ Jalike dey stay planted By da Temple Fo Da One In Charge Jalike dey come up Inside da open lanai Aroun da place wea oua God stay.

¹⁴ Even afta dose peopo dat do wass right Come ol an get gray hair, Dey still strong, Jalike dey get plenny life inside dem An dey still stay growing.

¹⁵ Dey tell, “Da One In Charge Stay do da right ting erytime. He jalike one big rock fo me, Cuz he take kea me. He ony stay good, No mo notting bad in him!”