Songs 91 - Hawaii Pidgin Bible

God Take Kea Us Guys

¹ Da God Dass Mo Importan Den All Da Odda Gods, He stay hide you Inside his secret place. Cuz he Da God Dat Get All Da Powa, He let you stay wit him Fo no mo notting hurt you.

² I tell dis bout Da One In Charge: “Him, he jalike one strong wall Dat no let notting hurt me. He da God fo me. I trus him.”

³ Da One In Charge Goin get you outa trouble. He no goin let da trap catch you. He no goin let da plague kill you.

⁴ He goin make shua notting go afta you Jalike da muddah bird Hide da small bird unda her wing. You can trus him! Dass why he stay jalike one shield O one wall fo proteck you.

⁵ You, you no need come sked Dat somebody goin attack you Nite time, O dat one arrow goin hit you Day time.

⁶ You no need tink, “Bumbye dark time, Da plague goin kill me! Bumbye noon time, Some bad spirit goin wipe me out!”

⁷ Notting bad goin happen to you, No matta tousan peopo mahke One side a you An mo den ten tousan peopo Da odda side.

⁸ You ony gotta look, An you goin see how God Pay back da peopo dat do bad tings.

⁹ You tell, “Eh! You Da One In Charge! You jalike da safe place wea I hide So notting goin hurt me!” Da God Dass Mo Importan Den All Da Odda Gods, You live wit him fo proteck you.

¹⁰ Cuz a dat, no goin get Notting bad happen to you. No mo notting bad Goin come nea wea you live.

¹¹ God, he goin tell His angel messenja guys Fo take kea you ery place you go.

¹² Jalike dey goin pick you up An carry you in dea hands Fo yoa feets no goin get bus up On da rocks.

¹³ You goin win ova eryting, Jalike if you wen fight Wit da young lions O da poison snakes.

¹⁴ Da One In Charge, dis wat he tell: “Eh, dis guy get love an aloha fo me An stay tight wit me, An he my guy cuz he know Who me fo real kine! Dass why I goin get him outa trouble An no let notting hurt him.

¹⁵ Any time he get trouble, He can yell to me Da One In Charge fo help him. I goin lissen him, I goin be dea Fo make shua notting hurt him, An I goin make shua erybody know he importan.

¹⁶ I goin make him stay good inside cuz he know he goin live long time, He goin see my powa Fo get my peopo outa trouble.”