Songs 88 - Hawaii Pidgin Bible

One Sad Song

One Korah ohana kine Song Fo God. Fo da main music guy. Heman from da Ezra ohana wen make dis teaching kine song.

¹ Da One In Charge, you da God Dat get me outa trouble. Day an nite time I yell fo help In front you,

² Try lissen my prayer Wen I yell to you fo help me!

³ Get choke plenny bad tings Dat happen to me An I no can handle dem. Jalike I litto mo go Inside da Mahke Peopo Place.

⁴ Peopo tink, me one a da ones Dat stay going down Inside da Deep Dark Hole. I wen come one guy Dat no stay strong no moa.

⁵ I jalike one mo mahke guy dat get kill An dey throw us all inside one grave, Jalike you donno us guys no moa, Jalike you no even rememba who us. Cuz all us guys stay cut off from you, An you no help us.

⁶ You wen put me down, Inside da bottom a da Deep Dark Hole.

⁷ You plenny huhu, jalike you smash me, An all yoa big waves poun me down. (Time out fo da music.)

⁸ You make my frenz stay Far from me. You make me look pilau to dem. You no let me get outa dis!

⁹ My eyes, all poho Cuz I stay sad inside. Still yet, ery day I yell fo you help me, An I put up my hands fo pray to you, Da One In Charge.

¹⁰ Fo shua, you no do awesome kine tings Fo da mahke peopo! Fo shua, da mahke peopo spirits No goin tell dat you da greates! (Time out fo da music.)

¹¹ No way, da mahke peopo Inside dea graves Goin tell erybody Dat you stay tight wit yoa peopo! Inside da Deep Dark Hole, No mo nobody goin tell Dat dey trus you!

¹² How da ones dat stay Inside da dark place Goin know da awesome tings you do?! No way! Inside dat place, you foget awready Bout all da peopo dea! How dey goin know dat you erytime Judge peopo da right way?! No can!

¹³ But me, I stay yell fo you help me, Da One In Charge! Morning time, wat I pray fo Come in front you.

¹⁴ Eh! You Da One In Charge! How come you make Jalike you donno me?! How come you no even show Yoa face to me?!

¹⁵ From small kid time, me pooa ting, An I litto mo mahke all da time! I stay suffa, cuz I real sked a you, An I stay bum out an donno wat fo do.

¹⁶ Wen you stay huhu wit me, I feel I pounded down. Wen you do tings Dat make me come sked, I no can do notting.

¹⁷ All day, da tings you do, Az jalike wen da big watta Come aroun da house, An eryting happen to me All da same time.

¹⁸ You make my frenz An da odda peopo I love Stay far away from me. I ony know da dark places.