Songs 87 - Hawaii Pidgin Bible

Song Bout Jerusalem Town

One Korah ohana kine Song Fo God

¹ Da One In Charge put da foundation Fo his big town Jerusalem On top da hills dat stay spesho fo him.

² From all da place wea da peopo live Dat get Jacob fo dea ancesta, Da One In Charge like Jerusalem town Mo den any odda place.

³ You peopo dat live Jerusalem town, Da same town wea God live, Erybody tell awesome tings Bout yoa town. (Time out fo da music.)

⁴ God tell, “I goin tell Dat even da Egypt peopo An da Babylon peopo Goin know me bumbye. Same ting fo da Filisha An da Tyre peopo, An da Sudan peopo too. I goin tell, ‘Dese peopo, dey get da same rights Jalike da ones dat born Jerusalem.’ ”

⁵ Dey goin tell dis Bout Mount Zion inside Jerusalem: “All dis peopo, jalike dey wen born dea.” God goin talk lidat, Cuz he da God Dass Mo Importan Den All Da Odda Gods, An he goin make Jerusalem town Da main place.

⁶ Wen Da One In Charge write down stuff Bout all da diffren peopos, He goin write, “Jalike dis one Wen born Jerusalem.”

⁷ Da peopo dat sing an dance tell, “Jerusalem town, All da good tings dat come to me, Come from dea!”