Songs 86 - Hawaii Pidgin Bible

Pray Fo Help

One David kine prayer

¹ Eh! You Da One In Charge! Lissen real good, Cuz I goin pray to you. Do wat I stay aks you fo do! Cuz I no mo notting, An I get real hard time.

² Make shua nobody kill me, Cuz I stay tight wit you. Get me outa trouble Cuz I yoa worka guy An you da God fo me, An I stay trus you.

³ You my Boss, so make good to me, Cuz all da time I stay yell Fo you help me.

⁴ You my Boss, so make nice to me, Cuz I trus you fo eryting inside.

⁵ You my Boss, an you get one good heart. You stay ready erytime fo let me go Fo da bad tings I wen do, You stay tight wit yoa peopo all da time, Wit da ones dat stay yell Fo you help um.

⁶ Eh! Da One In Charge, Lissen real good fo wat I stay praying. Lissen to da tings I stay aks you Fo do fo me!

⁷ Erytime get trouble, I goin yell to you fo help me, Cuz I know you goin help me.

⁸ You my Boss! No mo one mo God like you, From all da gods Dat da odda peopos pray to! No mo one mo god like you, Dat do da kine tings you do.

⁹ You my Boss! You wen make All da diffren peopos. Dey all goin come by you An go down in front you. Dey show choke respeck fo you. Cuz dey know wat kine god you.

¹⁰ Cuz you, you real big An you do awesome kine tings. You, you da ony one Dass God fo real kine!

¹¹ Eh! You Da One In Charge! Teach me how fo live da way you like. Fo me live da way you like me fo live. Let me go all out fo dis one ting: Fo show you respeck fo real kine Cuz I know wat kine god you!

¹² You my Boss! You da God fo me! I goin tell good tings bout you. I goin go all out, all da time, Fo show you choke respeck Cuz I know wat kine god you,

¹³ Cuz you stay real tight wit me. You even make um Fo me no gotta go da mos deep part A da Mahke Peopo Place!

¹⁴ Eh God! Get peopo dat tink dey get um, An dey stay attack me! Get peopo dat no like Give nobody chance, An dey come togedda Fo find me an kill me, An dey erytime ack Jalike you no mean notting!

¹⁵ But you my Boss. An you da kine God dat pity erybody An you erytime like give dem chance. You no come huhu real fas, You erytime stay tight wit yoa peopo, An dey know dey can trus you.

¹⁶ So, try look wea I stay, An make nice to me, No matta you no gotta make lidat. I yoa worka guy, so give me yoa powa. I wen born fo work fo you, So get me outa trouble.

¹⁷ Do someting fo me fo show You get one good heart fo help me. Den, wen da peopo dat hate me see dat, Dey goin come plenny shame, Cuz you Da One In Charge, you help me, An you make um So notting bodda me.