Songs 85 - Hawaii Pidgin Bible

Da Peopo Pray Fo Dea Country

Fo da main music guy. One Korah ohana kine Song Fo God

¹ Eh! You Da One In Charge! You like fo do good tings fo yoa land! You wen make eryting come good One mo time fo us Israel peopo!

² Da bad tings us Israel peopo wen do, No was right. But you wen hemo oua shame fo dat. You wen take kea a all da bad tings Dat us guys wen do. (Time out fo da music.)

³ Now you no stay huhu Wit us guys no moa. You pau go afta us Jalike you still mad.

⁴ Eh! You da God Dat get us guys outa trouble. Cuz a dat, go change yoa mind An help us guys one mo time. No stay sad inside Bout us guys no moa.

⁵ Goin be foeva dat you goin stay Huhu wit us guys, o wat? You goin go afta all da peopo Dat goin come from us guys bumbye Jus cuz you had it Wit da kine stuff us guys stay do, o not?

⁶ You goin make yoa peopo Come alive one mo time, Fo us guys stay good inside Cuz a you, o not?

⁷ Eh! You Da One In Charge! Let us guys see how you stay tight Wit yoa peopo, An do someting fo get us outa trouble!

⁸ I goin lissen real good To wat God, Da One In Charge, tell. He tell da peopo dat stay tight wit him He goin make eryting go good fo dem. But no good dey go do dumb tings One mo time, you know!

⁹ Fo shua, da peopo Dat show God plenny respeck, He goin get dem outa trouble real quick kine. Den, all ova oua land, Goin come awesome.

¹⁰ God, he erytime stay tight wit his peopo, An same time, His peopo erytime like do Wat he trus dem fo do! God, he erytime judge da right way, An same time, eryting come pono Fo his peopo!

¹¹ On top da earth, peopo come So God can trus um, An same time, God look down From da sky An make shua da right ting Happen fo dem!

¹² An mo den all dis, Da One In Charge Goin give good tings to us guys, An oua land goin grow Choke plenny stuff.

¹³ Jalike God sen one messenja guy Befo he come Fo tell erybody, “Gotta do Da right ting erytime! Cuz Da One In Charge, he stay come!”