Songs 83 - Hawaii Pidgin Bible

Da Odda Peopos Come Agains Us

Asaf wen make dis Song Fo God.

¹ God, no jus say notting! No go easy! No hold back fo do someting, God!

² Eh! Da diffren peopos Dat stay agains you, Dey stay amping out An making big noise. Da ones dat hate you, Dey make tantaran fo make Jalike dey goin bus you up.

³ Dey stay make one sly kine plan Fo wipe out yoa peopo. Dey come togedda fo talk Bout how dey goin go afta Da peopo you love.

⁴ Dey tell, “Go come! We go wipe out Da whole Israel nation! Fo nobody rememba Da Israel name no moa!”

⁵ Cuz da ones dat stay agains you, Come togedda fo figga out Wat dey goin do to you. An dey make one deal fo bus you up—

⁶ Dey da Edom peopo An da Ishmael peopo, Da Moab peopo An da Hagrim peopo,

⁷ Da Gebal peopo an da Ammon peopo An da Amalek peopo, Da peopo from Filisha, An da ones dat live Tyre town.

⁸ Da Assyria peopo join dem too. Dey all help da peopos Dat get Lot fo dea ancesta. (Time out fo da music.)

⁹ Make to dem jalike you wen make To da Midian peopo befo time, Jalike you wen wipe out Sisera an Jabin nea da Kishon Riva,

¹⁰ Da time oua peopo Wen wipe dem out nea Endor, An da mahke bodies wen rot An come jalike manua Fo da groun ova dea.

¹¹ Make dea alii guys come Jalike Oreb an Zeeb. Make all dea leada guys come Jalike Zebah an Zalmunna,

¹² Da guys dat wen tell, “Eh! Us guys goin go take ova Da good grass places Dat God make fo da sheeps, Fo all dat come oua property!”

¹³ But you my God. Make dem guys jalike da loose weeds, An jalike da junks from da wheat Dat da wind blow all aroun.

¹⁴ Jalike da fire burn da whole fores O burn up stuff all ova da mountains,

¹⁵ Same way, go sen yoa storms Fo chase dem guys away. Sen yoa hurricanes Fo make dem come real sked.

¹⁶ Make dem lose face an come shame, fo dem like find out bumbye Wat kine god you, Da One In Charge.

¹⁷ I like fo dem come shame an sked foeva. I like fo dem mahke Cuz dey lose face to da max!

¹⁸ You, yoa name Da One In Charge! I like dose peopos know Dat no mo anodda god jalike you! You da God Dass Mo Importan Den All Da Odda Gods! You stay in charge a da whole world!