Songs 82 - Hawaii Pidgin Bible

God, Da Judge Fo Da Odda Gods

One Asaf kine Song Fo God

¹ God, he sit on top his throne An all da odda “gods” Come togedda by him Cuz he da One dat judge all dem. He tell:

² “Eh you guys! No do wass not right no moa Wen you judge yoa peopo! No make nice no moa To da peopo dat do bad kine stuff! (Time out fo da music.)

³ “Wen you guys judge da peopo Dat nobody like help An da kids Dat no mo faddah-muddah guys, Do da right ting fo da ones Dat odda peopo tink Dey not importan, An da ones dat no mo notting!

⁴ Make shua nobody hurt Da peopo dat nobody like help An da ones dat get real hard time! Make shua da bad guys No goin get powa ova dem!

⁵ “Dem odda ‘gods,’ da ones in charge, Dey donno notting! Dey no undastan notting! Any place dey go, bad tings happen Jalike inside one dark place! Eryting dat make da world solid Stay shaking cuz a dem!”

⁶ God tell: “Me, I wen tell dis awready: You guys, peopo tink you ‘gods.’ All you guys, litto bit like me, Da God Dass Mo Importan Den All You Odda ‘Gods.’

⁷ But fo shua, you guys goin mahke Jalike peopo! You goin fall down mahke Jalike even da alii guys mahke!” Dass wat God tell.

⁸ Kay den, God! Go fo broke! Go be da judge Fo all da peopo inside da world! All da diffren peopos, dey yoas!