Songs 81 - Hawaii Pidgin Bible

Lissen Wat God Tell We Gotta Do

Fo da main music guy sing um wit da kine harp dey make Gat side. One Asaf kine song

¹ Yell fo oua God, Cuz you stay good inside An him da One make us guys strong! Make big noise fo God, Da one oua ancesta guy Jacob Wen pray to!

² Start one song, bang da tammorine! Play da small harp dat soun nice, An da ten string one too!

³ Wen da month start, da new moon time, Blow da sheep horn trumpets! Same ting Fo oua spesho religious kine ceremony Wen da moon come full!

⁴ Cuz dass one rule fo us Israel peopo. Da God dat Jacob wen pray to, He tell us fo make Dat kine religious kine ceremony.

⁵ Da time God wen go Agains da Egypt peopo, He wen tell da ones Dat come from Joseph Wat dey suppose to do. I wen hear one voice Dat I neva know who dat. Da voice tell:

⁶ “I wen take off da heavy load From yoa back, An I take da basket a bricks From yoa hands too!

⁷ Wen you was presha out, You wen yell to me fo help you. An I wen get you outa trouble. I was dea, but you neva see me, I stay hide in da middo A da thunda cloud. An you wen call, An I wen do plenny fo you. Den, Meribah side, Da place wea no mo watta, I wen tes you Fo find out If you goin trus me, o wat. (Time out fo da music.)

⁸ “Eh! You my peopo! Lissen, cuz I stay tell you, You betta watch out! I wen like you Israel peopo Lissen to me, but you neva!

⁹ You betta not pray to odda gods Dat not fo you, You betta not go down In front odda gods from odda places.

¹⁰ Me, Da One In Charge, Da God dat wen bring you hea Outa da Egypt land. If you stay ready fo take Wat I like give you, I goin give you plenny! Jalike you open yoa mout fo eat An I give you plenny food!

¹¹ “But my peopo, dey no like lissen Wat I tell. Da Israel peopo neva like do Wat I tell um fo do.

¹² Me, I let dem do wat dey goin do Cuz dey hard head An dey ony like do Wateva dey tink good fo dem.

¹³ Bummahs! I like Fo my peopo lissen me, But dey no lissen! I like fo da Israel peopo do tings Da way I do um!

¹⁴ If dey lissen, Real fas, I can make um So da ones dat stay agains dem No mo powa no moa. But my peopo no lissen. Dass why I no bus up Da peopo dat like fight dem.

¹⁵ If my peopo lissen, Den da ones dat hate me, Da One In Charge, Goin fall down cuz dey sked a me, An I goin punish dem foeva. But my peopo no lissen, Az why all dat no happen!

¹⁶ If you lissen, I can give you Da bestes kine wheat fo eat An give you plenny honey From da big rock, Fo fill you up. But you no lissen!”