Songs 80 - Hawaii Pidgin Bible

Help Oua Nation!

Fo da main music guy sing um wit da tune “Lily Flowas,” fo no foget. One Asaf kine Song Fo God

¹ You da one dat take kea Us Israel ohana guys Jalike one sheep guy Take kea his sheeps. You da one dat show Da Joseph ohana guys wea fo go, Jalike one sheep guy Show his sheeps wea fo go. So, lissen wat I tell! From da place you stay, Ova da Box Fo No Foget Da Deal, Wea da awesome angel watcha guys Stay on top— Show how strong you!

² So, let yoa peopo see you, Da ones from da Efraim an Benjamin An Manasseh ohanas! Show you strong, an come by us guys Fo get us outa trouble!

³ Eh God! Make us guys come Jalike we was befo time! Smile an show you stay good inside Bout us guys, Fo us guys get outa trouble!

⁴ Da One In Charge, You da God Ova All Da Armies! How long you goin stay huhu An no lissen wen yoa peopo Pray to you?!

⁵ You make yoa peopo cry, An dass da ony food you give um. You give um buckets a tears, ova an ova, An dass all you give um fo drink.

⁶ You make da peopos Dat live aroun us guys Make argue wit each odda Fo find out who goin take ova us. Da guys dat stay agains us Make any kine joke bout us.

⁷ You da God Ova All Da Armies! Make us come Jalike we was befo time! Smile an show you stay good inside Bout us guys, Fo us guys get outa trouble!

⁸ Wen you wen bring yoa peopo Outa Egypt, Az jalike you take One grape plant from ova dea. An afta you chase da diffren peopos Outa dis land, You let us guys live inside da land. Az jalike you plant dat grape plant Inside da groun ova hea.

⁹ Da way you wen clean out Da land fo us guys, Dass da same way peopo clean out Dea land fo put grape plant. Den az jalike us guys Get real strong root An fill up da whole land.

¹⁰ Us guys wen scatta all ova da land, From da mountains south side To da Lebanon mountains, north side, Jalike how da grape plant make shade Ova da mountains south side An da mangus cedar trees Lebanon side.

¹¹ Us guys wen scatta all ova fo live, From da Mediterranean Sea To da Eufrates Riva, Jalike how da grape plant Put branch all da way makai side, An make one shoot dat grow ova dea By da big riva.

¹² So, how come you let us guys Come all bus up?! Dass jalike you wen broke down Da walls aroun da grape plant Fo erybody dat go by dea steal da grapes!

¹³ You let peopo rip into us guys, Jalike da wild pig from da fores Rip into da grape plants, An all da wild animals From da boonies eat up eryting.

¹⁴ God, you da God Ova All Da Armies. Try look aroun one mo time An check out us guys! Look down from da sky An see wassup! Do dis jalike you stay plan Fo do good to yoa peopo. Cuz us jalike yoa grape plant You wen plant!

¹⁵ Dass us, jalike da grape plant You wen plant, Da young grape plant Dat you wen make grow.

¹⁶ Da odda peopos wen try Fo wipe out us guys, Jalike dey chop up yoa grape plant An burn um. I like fo dose peopo come wipe out. I like fo dem see Dat you stay huhu wit dem.

¹⁷ Go help da guy you wen pick Fo be yoa right hand guy, Da guy dass fo real, Cuz you make him strong fo help you.

¹⁸ Den us guys no goin bag from you. Make us guys come alive one mo time, Fo us yell fo you help us Cuz we know wat kine god you.

¹⁹ Eh! You Da One In Charge! You da God Ova All Da Armies! Make us come Jalike we was befo time! Smile an show you stay good inside Bout us guys, Fo us guys get outa trouble!