Songs 8 - Hawaii Pidgin Bible

Da Awesome God Make Peopo Importan

Fo da main music guy. Sing um wit da kine harp dey make Gat town. One David kine song.

¹ Eh! You Da One In Charge! You oua Boss! All ova da world, peopo know wat kine god you, Dat you stay awesome! You make da sky Fo show you da bestes!

² Even da tings dat come Outa da mout a kids an small bebes, You use dat! You show you get da powa Fo handle da peopo dat stay agains you An hate you An like pay you back.

³ Yoa sky, weneva I tink bout um An see da tings up dea dat you wen make wit yoa hands, Da moon an da stars dat you wen put dea,

⁴ I tink lidis: Us peopo, how come you no foget us?! Us guys, how come you even kea bout us?!

⁵ Cuz da way you wen make to erybody, Almos like dey God too, aah? You wen make us spesho, Jalike we kings.

⁶ You wen put us peopo in charge a da tings you wen make, You wen make us take kea eryting,

⁷ Da sheeps an da cows, Da wild kine animals, eryting—

⁸ Da birds dat fly in da sky, An da fish dat swim in da watta, Eryting dat swim da ocean currents.

⁹ Eh! You Da One In Charge! You oua Boss! All ova da world, peopo know wat kine god you, Dat you stay awesome!