Songs 79 - Hawaii Pidgin Bible

Pray Cuz Da Nation All Wipe Out

One Asaf kine Song Fo God

¹ Eh God! Da diffren peopos, Dey wen attack da land dass yoas. Dey wen make da Temple pilau Dat stay spesho fo you, Fo us guys no pray dea now. Dey wen bus up eryting Inside Jerusalem town.

² Dem odda peopos wen give Da mahke bodies A da peopo dat work fo you To da scavenja birds fo eat. Dey wen let da wild animals Eat da meat from da bones A da peopo dat stay tight wit you.

³ All ova Jerusalem town Dey wen kill yoa peopo An dump dea blood on top da groun Jalike dey pouring watta! No mo nobody fo bury yoa peopo!

⁴ Da peopos dat live aroun us guys Make fun a us guys. Dey make any kine to us An talk bad bout us Jalike we notting.

⁵ Eh! You Da One In Charge! Wen all dis goin come pau?! You goin stay mad all da time, o wat? You goin stay jealous, An burn up inside, o wat?

⁶ Mo betta you come huhu Wit da nations dat donno you, An cuz da peopo from dose countries Donno wat kine god you, Dey no aks you fo help dem.

⁷ Cuz dem, dey kill us peopo Dat get Jacob fo oua ancesta, An dey bus up da land Wea us guys live.

⁸ No go afta us cuz a da bad kine tings Oua ancesta guys wen do. Hurry up an come by us guys Fo show us yoa love an pity, Cuz right now, we desperate.

⁹ You da God dat stay get us outa trouble, So help us! Den peopo goin know wat kine god you An how awesome you stay. Get us outa trouble, an let us go. An hemo da shame fo da bad tings Us guys wen do! Den peopo goin know Wat kine god you.

¹⁰ No good da odda peopos Dat donno you tell, “Eh! Dem guys god, wea he stay?!” Da odda peopos, dey wen make Da peopo dat stay work fo you Bleed an mahke. So pay um back plenny fo dat. Let dose peopo know, Dat you da one punish um lidat, An let us guys see you do um.

¹¹ Wen you hear oua peopo Dat stay prisonas, moaning, Lissen to dem! You get choke plenny powa, So wen da judge guys From da odda peopos tell Dat oua peopo gotta mahke, Make shua dey no mahke!

¹² Boss, fo erytime Da peopo dat live nea us Talk harsh kine to you, Go do bad tings to dem, Seven mo times!

¹³ Us guys, yoa peopo. You take kea us guys Jalike we yoa sheeps. We goin tell good tings Bout you all da time, To oua kids, an oua grankids foeva. We goin tell da story Bout how you da greates!