Songs 78 - Hawaii Pidgin Bible

God An His Peopo

One Asaf kine song fo teach

¹ Eh my peopo! Lissen up! I goin teach you guys someting. Lissen to eryting I goin tell.

² I goin tell you guys stories Fo teach importan kine stuff fo make you tink, Fo make you guys undastan Wat da local kine peopo wen talk about Long time befo time, Dass hard fo undastan.

³ All us guys wen hear dis stuff awready, We know bout um, Cuz oua faddah guys Wen tell us da stories.

⁴ Same ting fo us guys, We no goin hide da teaching. We goin let oua kids know bout um. Cuz us guys gotta tell Da ones dat goin born bumbye How awesome Da One In Charge stay, An how strong him, An tell bout all da tings Dat stay hard fo do, But he do um.

⁵ Da One In Charge, he wen do stuff Fo make da Jacob ohana peopo No foget wat dey gotta do. He wen give da Israel peopo Da Rules he wen tell oua ancesta guys, Fo make shua da peopo dat come From dem goin know all dis.

⁶ He do all dis, fo da peopo know Dat goin come bumbye, Even da ones dat not born yet, Da ones dat come bumbye, Dey goin stay ready Fo tell dea kids da stories too.

⁷ Cuz a dat, dea kids goin trus God too, An no foget Da awesome tings God wen do. Az how dey goin stick Wit his Rules an do um.

⁸ God no like fo dem ack Jalike dea ancesta guys, Cuz da peopo from dat time, Dey get hard head, An neva like do wat God tell um fo do. Dose peopo, dey neva make shua Dey stay solid inside, Cuz da way dey stay inside, God no trus um.

⁹ Da peopo from dat time, Da army guys from da Efraim ohana, Dey get bow an arrow fo fight. But wen dey start fo fight, Dey run away.

¹⁰ Dey neva stick wit da deal Dey get wit God, Dey wen tell, “Us no goin live Da way da Rules From God tell!”

¹¹ Dey wen foget all da tings God wen do, An all da awesome tings He wen make um see.

¹² God wen do plenny tings In front dea ancesta guys, Tings dat wen make dea jaw drop, Ova dea Egypt side, aroun Zoan town.

¹³ God wen split open da Red Sea An take da peopo thru da middo To da odda side. He wen make da watta pile up Dis side an dat side Jalike had one dam dea.

¹⁴ Day time, God wen use one cloud Fo show da peopo wea fo go, Nite time, he wen use da light From one fire dat go up to da sky Fo show um da way.

¹⁵ Inside da boonies, He split open da big rocks Fo give da peopo watta fo drink, Uku plenny watta, Jalike come from da deep ocean.

¹⁶ He make watta Come outa one cliff An come down jalike rivas.

¹⁷ But da peopo, dey still yet Stay do bad tings. Dey go agains wat Da God Dass Mo Importan Den All Da Odda Gods Tell um fo do. Ova dea, wea no mo watta.

¹⁸ Inside, dey tink lidis: “Eh, we go tes God! We tell him he gotta give us guys Da kine food we like!”

¹⁹ Dey grumble bout God. Dey tell, “Dis God, he can make One big luau fo us guys, Hea inside da boonies, o wat?!

²⁰ Fo shua, Moses wen wack da cliff An plenny watta come out, Jalike rivas. But wat bout bread? You tink God Can give us guys bread, o wat?! You tink he can give his peopo meat, O no can?” Dass how dey talk.

²¹ Da One In Charge, he hear Da stuff dey tell. Dass why he get real mad. He sen fire fo wipe out Da Jacob ohana. He come huhu wit da Israel peopo.

²² Cuz dey neva trus God, az why. Dey neva like tink lidis: “God da One Fo get us guys outa trouble!”

²³ So God tell da clouds up dea Wat fo do, Jalike he open one door From da sky.

²⁴ God make da manna food come down From da sky jalike rain Fo give da peopo bread from da sky.

²⁵ All da peopo eat jalike dey alii. He sen um plenny food, All dey can eat.

²⁶ God tell da wind from da east Fo blow from da sky. He use his powa fo make da wind From da south come by dem too.

²⁷ Dass how God bring meat to dem Jalike was dirt Dat da wind blow aroun. Had plenny birds dat fly down, Was real plenny, Jalike da sand on top da beach.

²⁸ God make da birds fly down Inside dea camp place, All aroun da place wea God stay.

²⁹ Da peopo, dey pig out Till dey come full to da max. God bring um all da food Dey tell dey like eat.

³⁰ But befo da peopo pau eat Dat meat dey wen aks fo, Wen da food still stay inside dea mout,

³¹ God show he huhu wit dem. He kill dea mos stronges peopo, An make da young guys From da Israel ohana mahke.

³² But no matta wat God do, Da peopo still yet do bad kine stuff. Dey no trus God, even afta Dey see da awesome tings he do.

³³ Dass why God make eryting dey do, All da time dey live, come poho. He make da peopo come real sked, Fo dem mahke.

³⁴ But afta God kill some a dea peopo, Da ones dat still stay alive Change dea mind. Dey like know God Jalike dey wen know um befo time.

³⁵ Den da peopo no foget dat God, He stay jalike one big rock fo help dem. Da God Dass Mo Importan Den All Da Odda Gods, He da One wen pay da price Fo get um back.

³⁶ Still yet, da Israel peopo wen bulai God, Da way dey talk to him. Dey open dea mout Fo tell wass not true.

³⁷ Inside, erytime dey stay change How dey tink bout him. Da way dey ack, God no can trus um Fo stick wit da deal Dey wen make wit him.

³⁸ But God, he get pity fo dem, Az why he wen let da peopo go Fo da wrong tings dey wen do, An why he neva wipe dem out. Ova an ova, God wen hold back Da way he feel bout dose peopo, An he neva bus um up, No matta he stay huhu wit dem.

³⁹ Cuz he tink lidis: “Aah, dey ony peopo. Dey jalike da wind, Dat blow but no come back!”

⁴⁰ Plenny time, ova dea inside da boonies, Da Israel peopo wen tell God Dey no goin do how he tell um fo do. Dey wen make God Come plenny sore inside, Ova dea wea no mo notting!

⁴¹ Ova an ova, dey wen tes God Fo find out wat he goin do. Dey wen make him come sore inside, Da One dass good an spesho Fo da Israel peopo.

⁴² Dey neva rememba how strong God stay, Da time God wen cut dem loose From da Egypt peopo Dat wen stay agains dem.

⁴³ Dey neva tink bout Da tings God wen do Egypt side Fo show wat kine god him. He wen do awesome kine stuff Ova dea aroun Zoan.

⁴⁴ Dis wat God wen do Egypt side: He wen make da rivas ova dea Come blood. Even da streams, Nobody can drink da watta.

⁴⁵ He wen sen choke plenny bugs By da Egypt peopo fo bite um, An frogs fo mess um up.

⁴⁶ He wen let da grasshoppas go afta Da food da Egypt peopo wen grow, He wen let da locust bugs Eat up eryting da peopo wen work fo.

⁴⁷ He wen make hail fall down From da sky jalike rain Fo kill da grape vines An make da fig trees mahke From da cold.

⁴⁸ Dea cows, same ting, God wen let da hail kill um, An da lightning hit Da animals dey own.

⁴⁹ God stay plenny huhu dat time. He neva take wat da Egypt peopo do. Dass why he wen make hard Fo dem an give um big trouble, He wen sen Choke plenny angel messenja guys Dat do bad tings to dem.

⁵⁰ Cuz God bus up All da Egypt peopo cuz he huhu, He no hold back fo kill um, An he make da real bad kine sick Get um.

⁵¹ Ery numba one boy From ery ohana inside Egypt, God wen kill um, Da strong ones Dat get Ham fo dea ancesta guy.

⁵² Fo God peopo, he wen tell dem Fo start fo move jalike sheeps, He wen bring um thru da boonies Jalike he one sheep guy.

⁵³ God neva let notting bad happen To dem dat time. Dey neva come sked notting. But da guys dat wen go Agains God peopo, Da Red Sea watta wen go ova dem.

⁵⁴ God wen bring his peopo to da edge A da land dat stay spesho fo him, To da mountain he wen take ova Cuz he stay strong.

⁵⁵ He make da odda peopos Run away from his peopo. He make one plan an measure Da property fo da Israel ohanas Fo dem live wea da odda peopos Wen stay befo time.

⁵⁶ But da Israel peopo, Dey ony like tes God Fo see wat he goin do, Da God Dass Mo Importan Den All Da Odda Gods, Dey neva do da tings he teach um.

⁵⁷ Jalike dea ancesta guys, Dey wen bag from God An neva stay tight wit him. Az why God no can trus dem. Dey jalike one bow dat no shoot strait.

⁵⁸ Wen dey make place fo pray On top da hills, Dey make God feel bad. Dey go down an pray To dea idol kine gods, An dat make God come jealous.

⁵⁹ God know wat dey stay do, An fo shua he tell “Laytas” to dat. He tell dat da Israel peopo, Dey not his peopo no moa.

⁶⁰ God wen bag from da tent Dey wen put up Shiloh side, Fo be da place wea da peopo Can come togedda wit God.

⁶¹ God wen make da odda peopos Capcha da Box Dat stay fo make da peopo tink Bout how strong God stay. God make dem take ova da Box Dat help peopo no foget How awesome God stay.

⁶² God wen let odda peopos Kill his peopo wit dea swords, Cuz he plenny huhu wit his guys.

⁶³ Da war eat up dea young guys Jalike fire wen kill um. Dea young girls, Nobody sing wedding song fo dem Cuz no mo nobody fo dem marry.

⁶⁴ Da odda peopos kill da Jew pries guys Wit dea sword, Da widows, dey neva even have time Fo make funeral.

⁶⁵ But den, jalike da Boss Up Dea Wen wake up afta he sleep, Jalike one army guy drink wine, But den he wake up ready fo fight.

⁶⁶ God wack da peopo Dat wen go agains him An make dem come shame Fo long time.

⁶⁷ Dat time, Da One In Charge Neva pick da Joseph ohana, He neva like da peopo Dat come from Efraim.

⁶⁸ Da ohana dat God wen pick, Az was da Judah ohana. He wen pick Zion hill Inside Jerusalem town, Cuz he get love an aloha Fo dose peopo ova dea.

⁶⁹ God wen build da Place Dat Stay Spesho Fo Him, Fo stay jalike his place Up dea inside da sky. God wen make his place solid Jalike da earth, Wit solid foundation foeva.

⁷⁰ God wen pick David, his worka guy. He wen tell David fo leave da sheeps Dat he take kea of.

⁷¹ God wen bring David back From wea he help da muddah sheeps Wit dea bebes, Cuz God like fo David Take kea God peopo, da Israel peopo.

⁷² Dass why David Take kea God peopo, Wit one good heart, So no can poin finga him notting. David wen know how Fo show God peopo Wea fo go an wat fo do.