Songs 77 - Hawaii Pidgin Bible

God Help Peopo Wen Dey Get Trouble

Fo Jedutun, da main music guy. One Asaf kine Song Fo God.

¹ I stay yell to God cuz I stay sad inside! I yell to him fo him lissen me.

² Wen I get hard time, I pray to my Boss Fo him show me wat I gotta do. All nite, I put up my hands fo pray, An no come tired. But inside, I no can res.

³ I tink bout God, an I moan. I tink plenny bout stuff, An jalike I pass out inside. (Time out fo da music.)

⁴ You make my eyes stay open! Plenny tings bodda me, Az why I no can even talk!

⁵ I no foget how was befo time, An I tink bout how was Long time befo time.

⁶ I no foget how befo time I wen sing, nite time. I tink real plenny, An inside, I tink “Wassup?”

⁷ But now, I tell: “I donno bout my Boss. Maybe he goin throw me out foeva! O maybe he no goin like me bumbye!

⁸ Maybe God no like Stay tight wit his peopo no moa! Maybe da ting he wen promise fo do, He no goin do um now, o layta!

⁹ Maybe God foget how fo give chance! Maybe he stay huhu, An no show pity no moa!” (Time out fo da music.)

¹⁰ I tell dis too: “Da ting dat bodda me Da mostes, is dis: Da God Dass Mo Importan Den All Da Odda Gods, He use his powa now fo do Diffren kine stuff den befo time.”

¹¹ But you know wat, Da One In Charge?! I goin no foget all da tings You wen do awready. I goin tink bout Da awesome kine stuff You wen do befo time.

¹² All da tings you stay do, I goin tink bout um ova an ova, An try fo tink Wat kine work you stay do.

¹³ God, da way you do stuff, stay real good an spesho. No mo anodda god Dat stay big like you!

¹⁴ You, da God dat stay do Awesome kine tings. You make all da diffren peopos know, How strong you!

¹⁵ You wen use yoa powa Fo get yoa peopo outa trouble, Da peopo dat get Jacob An Joseph fo dea ancesta guys. (Time out fo da music.)

¹⁶ Eh God! Da ocean wen shake, Jalike he see you an come sked. All da way to da bottom a da ocean, Jalike da watta ack sked.

¹⁷ Da clouds wen make Plenny rain an thunda, Da lightnings go all ova da place Jalike you shooting arrows.

¹⁸ Yoa thunda wen make noise Jalike da war wagon wheels. Da lightning shine light All ova da world. Get big earthquake too.

¹⁹ Da way you wen go was right thru da ocean. Yoa road, wea get da big watta, Nobody know az was yoa footprints.

²⁰ You wen show yoa peopo wea fo go Jalike one sheep guy. You wen use Moses an Aaron Fo do all dat.