Songs 76 - Hawaii Pidgin Bible

God Win

Fo da main music guy sing um wit string instruments. One Asaf kine song.

¹ Inside da Judah land, God let peopo know him. Inside da Israel land, Dey know who him, Dat he da greates.

² Jerusalem, dass wea God stay, Inside his Temple on top Mount Zion.

³ He broke da fire arrows Dat come from da bow. He broke shields an swords An all da odda kine army stuff. (Time out fo da music.)

⁴ God, you awesome, jalike da light. You stay mo awesome Den da big mountains Wea da wild animals live.

⁵ Had hard head peopo Dat come agains us, But us guys wen take away All da tings dey get fo fight, An now, dey look Jalike dey sleeping— But dey mahke fo real kine! Not even one a dea strong army guys Can use dea hands fo hurt us.

⁶ Wen you scold dem, Da horses an da guys dat ride um Fall down an pass out, Cuz you da same God Oua ancesta Jacob wen pray to.

⁷ But you, God, Dey betta come sked a you! No mo nobody can go agains you Wen you had it wit wat dey stay do!

⁸ From da sky, you wen tell, Gotta punish dem. All ova da world, Peopo no say notting, Cuz dey sked az why.

⁹ God, you da Judge, An az was da time fo you Fo punish da peopo dat need fo be punish, Fo get all da peopo in da world Outa trouble Dat get plenny presha. (Time out fo da music.)

¹⁰ Wen peopo come real huhu, Dat show proof dat you da bestes. An if dey stay had it wit you still yet, Dat make you look good.

¹¹ Do da tings fo yoa God, Da One In Charge, Dat you guys wen make One promise to him fo do. All da nations dat stay aroun Jerusalem, Bring presents fo da One Dey gotta respeck.

¹² He no let dea leada guys feel proud, An he make king guys All ova da world stay sked a him.