Songs 75 - Hawaii Pidgin Bible

Mahalo To God

Fo da main music guy, one Asaf kine song, wit da tune “No Wipe Um Out”

¹ Eh God, us guys tell erybody Dat you da greates! You da greates, cuz we know You da kine God Dat stay hea fo help us! Erybody tell bout Da awesome tings you wen do!

² God tell: “I goin pick da time fo judge da peopo, I da one goin judge um fo real kine.

³ Wen da world shake An all da ones dat live dea No can stan up, I da One make da foundation Stay strong. (Time out fo da music.)

⁴ “I tell da guys dat talk big Bout wat dey do, ‘No talk big!’ I tell da guys dat stay do Bad kine stuff, ‘No show off how strong you stay!

⁵ No go shake yoa fis at da sky O make tantaran, Jalike like you da ony one Get da right fo talk!’ ”

⁶ Cuz no mo nobody Can help one guy come importan, Nobody from da east side, O da west side, O from da boonies.

⁷ Ony God, he da One Dat judge fo real kine. He can make one guy come notting, An he can make anodda guy Come importan.

⁸ Wen Da One In Charge come huhu, Jalike he holding one big wine cup Full a strong kine wine mix wit spice An bubble coming up. He goin make all da peopo Inside dis world Dat do bad kine stuff Drink da whole ting, Down to da junks in da bottom, Fo punish dem!

⁹ But me, dat make dis song, I goin tell bout God foeva. I goin sing to da God My ancesta guy Jacob wen pray to.

¹⁰ God tell: “Da peopo dat stay do bad kine stuff, I goin take away all dea powa. Da peopo dat stay do wass right, I goin give dem plenny mo powa.”