Songs 74 - Hawaii Pidgin Bible

Da Temple All Bus Up

One Asaf kine poem

¹ Eh God! How come You wen dump us guys?! Goin be lidat all da time, o wat?! You stay real huhu wit us guys, Jalike smoke come outa yoa nose! An us, jalike da sheeps Dat live on top yoa land An you jalike da sheep guy Dat take kea us!

² No foget da peopo dat stay come Togedda fo pray to you, Da ones dat long time befo time You wen buy um Fo be one peopo Dat stay tight wit you. No foget Mount Zion, wea get Da Temple wea you stay.

³ Go up to da place Dat stay bus up all da time. Da army guys dat stay agains us Wen make eryting come bad Inside da Place Dat Stay Spesho Fo You!

⁴ Da army guys dat go agains you Wen go inside da place Wea you meet wit yoa peopo. Dey wen yell plenny cuz dey win. Dey wen put dea marks all ova da place Fo erybody know dey wen win.

⁵ Dey ack jalike guys dat carry dea axes Fo cut down one bunch trees.

⁶ An den, same time, dey go smash Da carve wood inside da Temple Wit ax an crowbar.

⁷ Dey wen burn down da place Dat stay spesho fo you, All da way to da groun. Da place wea erybody know dat you live, Dey wen make um so no can pray dea.

⁸ Dey wen tink, “Eh! Us go bus up da Israel peopo!” So den, dey wen burn up All da odda places too, Wea peopo come togedda fo pray to God All ova da land.

⁹ Us guys, no mo spesho mark Fo show who us. No mo nobody talk fo God no moa. No mo nobody wit us know Wen all dis trouble no goin be no moa.

¹⁰ God, how long mo dey goin Make us come shame, Da guys dat stay fight wit us?! Da guys dat come agains us, Dey goin talk bad bout you Fo give you one bad rep, o wat?!

¹¹ How come you no use yoa powa Fo help us? Take yoa hands outa yoa pocket, An wipe out dem army guys!

¹² Still yet, from long time befo time, You, God, stay da king fo me. You do plenny inside da world Fo get yoa peopo outa trouble.

¹³ Was you wen split Da watta inside da sky From da watta inside da ocean, Cuz you strong! Was you wen smash Da heads a da sea monstas On top da watta.

¹⁴ Was you wen smash da heads A da Leviatan sea monsta. You wen give his body fo feed To da wild animals Dat live wea no mo peopo.

¹⁵ Was you wen open up da pukas Fo watta come outa da groun An split da valleys fo da streams. Was you wen dry up da rivas Dat get watta all da time.

¹⁶ You, da boss fo da day time, An fo da nite time too. Was you wen set up da sun An da odda tings dat shine light.

¹⁷ Was you wen make wea da land Meet up to da watta. An wen come hot an wen come cold, You wen make dat too.

¹⁸ Eh! You Da One In Charge! Try no foget dis— Da peopo dat stay agains you, Dey like make you come shame. Da stupid peopo dat tink You not importan, Dey talk bad bout who you.

¹⁹ No turn me ova to dem, Dey jalike wild animals Dat like kill one small dove. Yoa peopo dat suffa plenny No foget eva, dea life too.

²⁰ Tink plenny bout da deal You wen make wit us guys. Cuz all ova da land, get dark places An plenny peopo hide dea, Dat like bus up odda peopo.

²¹ Do someting, fo da peopo Dat get plenny presha No come shame one mo time. Do someting fo help da pooa peopo An da ones dat no mo notting, Fo dem tell good tings bout you, Cuz dey know wat kine god you.

²² Stan up an make shua erybody know How come you stay do Wat you stay doing! No foget how da stupid peopo Talk all day fo try Make you come shame.

²³ No foget wat da peopo tell, Da ones dat stay agains you, An da big noise dat come out Mo an mo all da time From da ones dat like win ova you!