Songs 73 - Hawaii Pidgin Bible

Book Numba Three ( Songs 73–89 ) God Do Da Right Ting

One Asaf kine Song Fo God

¹ Fo shua, God do good tings Fo da Israel peopo, Fo da ones dat stay clean inside.

² Me, I wen almos miss out, Jalike I almos fall ova one cliff, Jalike my feets almos slip An I fall down.

³ I wen see da peopo dat tink Dey no need lissen God, An I wen tink, “I like be jalike dem guys!” I wen see da peopo dat do bad tings, An eryting stay good fo dem. Dass wat wen throw me off.

⁴ Da bad guys, no bodda dem Dat dey goin mahke. Dey get plenny fo eat.

⁵ Odda peopo, dey get plenny problem, But not da bad guys. Dey no suffa jalike all da odda peopo.

⁶ Az why da bad peopo Ack high makamaka, Cuz dey proud, Jalike az one necklace dey show off. Dey ack jalike dey like bus up peopo, Jalike az one fancy kine clothes.

⁷ Dey all jam up inside. Az why dey no mo pity fo nobody. Dey ony tink fo do bad kine stuffs.

⁸ Dey make fun a da odda peopo, An make one plan fo do bad tings. Dey ack high makamaka An make one plan Fo put presha on peopo.

⁹ Dey even talk bad bout God in da sky An talk big bout eryting Dat dey do all ova da world.

¹⁰ Dass why God peopo bag out from God Fo lissen dem, Dey God peopo, but dey like hear Eryting da bad guys tell, Jalike dey tanking watta.

¹¹ Da bad peopo talk lidis: “Eh, how God goin find out Wat us stay do? No can! Dis God Dass Mo Importan Den All Da Odda Gods, You tink he know wass happening, O wat?! Nah!”

¹² Dass how da peopo Dat do bad kine stuff stay. No mo notting bodda dem any time. Dey stay make Mo an mo plenny money.

¹³ Dis how I tink befo time: “Ony wase time fo me Make me come clean inside! Ony wase time I no do bad kine stuff!

¹⁴ Cuz all da time, I feel presha out. Ery morning, God punish me Some moa!”

¹⁵ But, good I wen make shua Dat I no talk lidat to nobody. Cuz if I wen talk lidat, Garans I wen come one backstabba Fo yoa peopo, God.

¹⁶ Dass why I wen try hard fo undastan How come eryting come good Fo da bad guys. An I wen tink, no good Fo even try undastan.

¹⁷ But den, one time, I wen go inside Da place dat stay spesho fo you, God! Inside dea, I wen start fo undastan Wat goin happen To da bad guys bumbye!

¹⁸ Eh God! You put dem Wea dey goin slide down An fall down one cliff. You make dem come wipe out Cuz dey donno wea dey going.

¹⁹ Real fas, God make dem real sked An wase um! Horraz kine stuff Goin come on top dem, An dey goin mahke cuz a dat!

²⁰ You, you my Boss! You know Da bad peopo, dey notting, Jalike one guy dream an wake up An tell, “Dass was ony one bad dream! No need tink bout um no moa!”

²¹ Me, I wen come real sore inside, Jalike somebody wen stab my heart.

²² Me, I stupid, an donno notting! Eh God, gotta be you was tinking Dat I jalike one lolo animal.

²³ But eh Da One In Charge! Still yet, I stay tight wit you, Jalike you stay hold my right hand.

²⁴ You stay teach me wass good fo do, Fo show me wea fo go. Bumbye you goin make me Come awesome.

²⁵ Eh God! You da ony one fo me, Up dea inside da sky! An I no need notting inside dis world, Cuz I get you!

²⁶ No matta my body an my heart Come litto mo poho, You make me stay strong inside, Jalike one rock. An da one ting I get fo shua, Is you, God, foeva.

²⁷ I know dis: Da peopo dat no stay nea you, Dey goin come wipe out. Da peopo dat like fool aroun Wit odda gods, you goin wipe dem out.

²⁸ Fo me, da bestes ting is dis: Fo me come mo tight wit you, God. Eh! Da One In Charge, my Boss, I go by you fo you proteck me! I goin tell erybody Bout all da awesome tings You stay do!