Songs 72 - Hawaii Pidgin Bible

Song Fo Da New King Pray Fo Da King

Fo King Solomon

¹ Eh God! Teach da new king fo know Wass right an wass wrong, Jalike you know um, An help him do da right ting erytime Jalike you do um. Dis fo da new king, Dat wen born from da ol king.

² Weneva he judge yoa peopo, God, Let him judge um da right way. Even wen he judge yoa pooa ting guys, Let him make eryting Come right fo dem.

³ I like da peopo stay do wass right, Cuz den, da up country land Goin give enuff food Fo make eryting okay fo dem, An da hill land Goin give um plenny too.

⁴ Wen da king judge his peopo, I like fo him make shua Fo help da pooa ting guys. An fo da ohanas dat need plenny, I like fo da king get um outa trouble An poun da ones Dat like take away dea rights.

⁵ God, I like fo yoa peopo Show you choke respeck foeva, All da time da sun An da moon stay shine, Fo dem, dea kids, An dea grankids, foeva.

⁶ I like fo da king make good tings Happen fo da peopo, Jalike da rain dat come down Right afta dey cut da grass, An jalike da passing showas Dat make da groun get plenny watta.

⁷ All da time da king stay alive, I like fo erybody stay do wass right. I like fo eryting go good fo erybody Foeva, till da moon pau shine.

King Fo Da Whole World

⁸ I like fo da king stay in charge From one ocean to da odda ocean, From da Eufrates Riva To da mos far place inside da world!

⁹ I like fo da peopo dat live Wea no mo watta Go down on top dea knees In front him. I like fo da ones dat stay agains him Eat dirt!

¹⁰ I like fo da king guys from Spain An all da islans Come back to oua king Fo give um gifs. I like fo da king guys From Yemen an Ethiopia Bring wat dey owe Fo show he da boss fo dem.

¹¹ I like fo all da king guys Go down in front him. I like fo all da nations Stay his worka guys.

Da King Help Da Peopo Dat No Mo Notting

¹² Az why da peopo dat need plenny, An da ones dat no mo nobody Fo help dem, Wen dey yell fo help to dis king, He goin get um outa trouble!

¹³ Da king, he no goin hurt da peopo Dat no can do notting An dat need plenny. He goin keep dem alive An get um outa trouble.

¹⁴ Wen odda peopo make any kine To da pooa peopo An bus um up, Dis king goin pay da price Fo make shua dey stay alive. An if somebody make dem Bleed an mahke, Da king kea plenny bout dat, Cuz dey spesho fo da king.

Pray Dat Eryting Come Out Good Fo Da King

¹⁵ Da king, I like fo him live long time! I like fo peopo give him Gold from Yemen. I like fo peopo pray fo him all da time An aks God all day Fo do good tings fo him.

¹⁶ I like fo da land grow Plenny food fo harves, Dat grow food all da way To da mountain tops! I like da land get plenny fruits, Jalike Lebanon! I like fo eryting go good Fo da peopo inside da towns. I like fo da peopo come Jalike wen da grass get flowas All ova da country side!

¹⁷ I like fo peopo no foget Wat kine king him, Foeva, all da time da sun stay shine. I like fo all da nations tell, “God do good tings fo us, Cuz a dis king an his ohana!” An dey tell, “Dis king, Fo shua he stay good inside!”

Book Numba Two Pau

¹⁸ I like erybody tell good tings bout God, Da One In Charge, Da God fo us Israel peopo! Him da ony god dat do stuff Dass awesome fo real kine!

¹⁹ I like fo erybody tell Good tings bout him all da time, Cuz dey know how awesome him! I like fo erybody all ova da world Know how awesome he stay! Dass it! Pau.

²⁰ Dass da las prayer in dis book A prayers from Jesse boy King David.