Songs 71 - Hawaii Pidgin Bible

One Ol Guy Aks God Fo Help Him I Trus You

¹ Eh! You Da One In Charge! You da one take kea me Fo me no get hurt. No let nobody Make me come shame, eva!

² You do da right ting erytime, So get me outa trouble An no let notting bad happen to me. Lissen good to wat I goin tell you An get me outa trouble.

³ Be dea fo me, jalike one big rock Wea I can hide erytime. You tell dat you goin Get me outa trouble. You, you stay strong Jalike one big rock, Jalike one place inside da mountains Wea nobody can come afta me.

⁴ You my God, So get me outa trouble From da peopo dat do bad kine stuff. No let da peopo dat no do wass right An put presha on me, catch me.

⁵ You my boss, an I stay shua Dat bumbye you goin do Good tings fo me. Eh! You Da One In Charge! From da time I was one young boy, I still stay trus you.

⁶ Was you dat take kea me Even befo I born, You da one wen born me Outa my muddah. You da one I tell Good tings bout, foeva.

Get Peopo Dat Stay Agains Me

⁷ Plenny peopo watch me, Fo dem do wat I do. Cuz you strong, An you no let nobody hurt me.

⁸ Da ony ting I talk bout Is dat you da greates! All day, I talk bout How awesome you stay.

⁹ An now, I ol. No throw me out! No dump me Jus cuz I no stay strong no moa.

¹⁰ Cuz now, da peopo dat stay agains me, Dey talk any kine bout me. Da peopo dat stay wait fo dem kill me, Dey make one plan wit each odda.

¹¹ Dey tell, “God dump him awready. No mo nobody can get him outa dis! So go afta him an catch him!”

Help Me

¹² Eh God! No stay far from me! My God! Do someting Fo help me right now!

¹³ Da ones dat come agains me fo kill me, I like fo dem come plenny shame An come wipe out. Da ones dat stay look Fo how dey goin hurt me, I like fo peopo tell dem Az no good wat dey do, An I like fo nobody Get respeck fo dem.

I Goin Tell Good Tings Bout You

¹⁴ But fo me, foeva I stay shua You goin do good tings fo me. I goin tell peopo mo an moa Dat you da greates.

¹⁵ I goin tell da story bout how You stay do da right ting erytime. I goin talk all day bout How you get peopo outa trouble, No matta I ony know litto bit Wat you do!

¹⁶ I goin tell Bout da awesome tings Da One In Charge a me stay do. I no goin foget how you stay do Da right ting erytime, I goin talk ony bout you.

I Stay Shua You Goin Take Kea Me

¹⁷ God, from da time I was one young boy, You stay teach me, An now, I goin tell erybody Bout da awesome tings you do!

¹⁸ No matta I ol awready an get gray hair, God, no dump me, Till I pau tell da kids How strong you stay, An tell all da ones Dat goin born afta dem, Da kine powa you get.

¹⁹ Eh God, you do wass right erytime, An erybody know dat, From hea inside da world To up dea inside da sky! You wen do big tings, God. No mo nobody stay jalike you!

²⁰ No matta you wen make me go Thru plenny bad kine trouble, You goin make me come back alive. You goin bring me back up No matta I stay almos inside da grave.

²¹ You goin make me come One mo importan guy den befo time. You goin make me Stay good inside, one mo time.

²² I goin tell erybody dat I yoa guy, An sing bout you, my God, Wit da ten-string harp, Bout how I can trus you Fo do wat you tell. I goin sing fo you Wit da small harp too, Cuz you da God Dat Stay Good An Spesho, Da One us Israel peopo stay pray to.

²³ Wen I sing fo you, I goin yell cuz I stay real good inside. I goin go all out fo sing to you, Cuz you wen pay da price Fo get me outa trouble.

²⁴ All day, I goin talk plenny bout How you do da right ting erytime. Cuz da peopo dat wen look fo me Fo do bad tings to me, Dey shame now, an lose face!