Songs 70 - Hawaii Pidgin Bible

Pray To Da One In Charge “Help Me!”

Fo da main music guy, one David kine song fo make sacrifice, fo God no foget him

¹ Eh God! Get me outa trouble! Eh! You Da One In Charge! Help me right now!

² Fo da peopo dat like kill me, I like dem ony come shame. Da ones dat feel good inside Wen bad stuff happen to me, I like God make dem turn aroun An run away an lose face.

³ Da ones dat tell me “Ahana kokolele!” I like dey come shame to da max!

⁴ All da peopo dat like know you Fo real kine, I like fo dem stay real good inside, An dance an sing! Da ones dat get love an aloha fo you Cuz you get um outa trouble, I like fo dem tell foeva, “God, he da greates!”

⁵ But me, pooa ting, I no mo notting! I ony get hard time. Eh God! Do someting fo me, right now! Cuz you da one dat help me, An make shua I get outa trouble. You, you Da One In Charge! No make me wait long time!