Songs 69 - Hawaii Pidgin Bible

God, Help Me!

One David kine Song Fo God, fo da main music guy sing um wit da tune “Lily Flowas”

¹ Eh God! Get me outa trouble! Jalike da flood watta Come up to my neck awready!

² Jalike I go deep down inside da mud An no mo place Fo me stan up down dea! Jalike I stay inside one stream Full a watta An da watta go up An cova my head!

³ I yell to you real plenny fo you help me. Az why I stay tired! Az why my throat feel jalike stay burn, An my eyes come weak. You my God, I stay wait Fo you fo do someting.

⁴ Da peopo dat stay hate me, An I neva do notting Fo make dem hate me, Get mo plenny a dem, Den I get hairs on top my head! Get choke plenny peopo Dat like kill me Fo make me shut up foeva! Dey stay agains me, But dey ony bulai bout me. Dey talk jalike I gotta give back someting Dat I neva take away from nobody!

⁵ Eh God! You know awready, All da real stupid kine tings I wen do. I no can hide from you Da tings I wen do Dat I get da blame fo.

⁶ You my Boss, da God Ova All Da Armies. No let da peopo dat trus you Come shame cuz a me! You da God dat da Israel peopo pray to. No let da peopo dat trus you Lose face cuz a me!

⁷ Cuz I yoa guy, plenny peopo Talk stink bout me, An I suffa plenny. Dey make me come shame, Fo me no face da peopo.

⁸ I no can even talk to my ohana peopo, An my muddah odda kids ack Jalike I not from hea.

⁹ Cuz I go fo broke Wen I tink bout yoa Temple, Az why wen peopo like talk bad Bout you, Dey talk bad bout me firs.

¹⁰ Da time I wen come plenny sore inside An cry plenny An no eat so can pray, Dey even wen talk bad bout me Cuz a dat!

¹¹ Da time I wen wear Burmbag kine clotheses Fo show I stay sad inside, Dem guys, dey make fun a me.

¹² Da guys dat hang out by da town gate, Dey talk any kine bout me. Da piloot guys Even make songs bout me.

¹³ But me, I stay pray to you, Da One In Charge. Wen da right time come, God, Do wat I aks you fo do, Cuz you stay tight wit yoa peopo Big time, An I can trus you Fo get me outa trouble!

¹⁴ Get me outa hea, Cuz jalike I go down Inside da slimy mud. Get me outa trouble From da peopo dat hate me, Cuz jalike I stay inside da deep watta.

¹⁵ No let da flash flood carry me away, No let da deep watta Pull me down inside, No let da Deep Dark Hole Cova me.

¹⁶ Eh! You Da One In Charge! Do someting fo help me! Cuz az good, How you stay tight wit yoa peopo. Turn aroun an look at me, Cuz you get plenny pity Fo do stuff fo me.

¹⁷ No look da odda way An hide so I no can talk to you, Eh! Dis me, yoa worka guy! I stay stressing out, So do someting fas!

¹⁸ Go come nea me, Get me outa trouble, Do wat you gotta do fo save me, Cuz get peopo dat stay agains me.

¹⁹ You know awready How all da peopo dat stay agains me, Talk stink bout me An make me come shame An make any kine to me.

²⁰ Da way dem guys talk bad bout me, Inside I come real sore. I look fo somebody Dat can take away da sore, But no mo nobody can do dat.

²¹ Fo food, dey give me poison Dat taste bad, Wen I stay thirsty, Dey make me drink vinega.

²² Wen dey make dea dinnas By da Temple, I like dem guys come wipe out Cuz a dat. Wen dey tink eryting stay okay Fo dem an dea frenz, I like dem fall inside one trap.

²³ Make dea eyes come blind Fo no see notting. Make dea body come All weak an shaking.

²⁴ Get mad an punish um plenny! Stay huhu wit dem! No let um run away!

²⁵ I like da place dey make camp Come all bus up. I like dea house come So no mo nobody live dea.

²⁶ Cuz wen you punish somebody, Dey go afta da same guy. An wen you stab somebody, Dey tell erybody How much you wen hurt dem.

²⁷ Keep track a ery crime dey do. Wen you tell Wass right an wass wrong, No let um go.

²⁸ Wipe out dea name From da Book Dat Tell Who Get Life. No write um wit da peopo Dat stay do wass right.

²⁹ But me, I stay suffa, an I hurt. Eh God, get me outa trouble So notting bad happen to me.

³⁰ I goin sing fo tell dat God, he da greates, Cuz I know wat kine god him. I goin tell erybody dat God, he big, An dat I like tell him “Mahalo plenny!”

³¹ Wen I do dat, Da One In Charge goin tell, Mo betta sing an talk lidat, Den bring one bull Fo make one sacrifice.

³² Da peopo dat stay suffa, Goin see wat stay happening, An dey goin stay good inside Cuz a dat! All you peopo dat like find God, You goin get one good life cuz a dat!

³³ Cuz Da One In Charge, Him da kine God stay lissen To da peopo dat no mo notting. Even wen his peopo stay prisonas, He no make to dem jalike dey junk.

³⁴ I like fo eryting dat move inside da sky Tell dat God da greates, An da peopo all ova da world Tell dat he da greates. Same ting fo da ocean, An eryting dat move aroun inside dea.

³⁵ Cuz da Jerusalem An Mount Zion peopo, God goin get dem outa trouble. He goin build da towns All ova Judah one mo time. Dose peopo goin live dea, An dea towns goin stay dea property.

³⁶ Da peopo dat get ancesta guys Dat wen work fo God, Dey goin own da land. Da ones dat get love an aloha fo God Cuz dey know wat kine god him, Dey goin make dea house dea.