Songs 68 - Hawaii Pidgin Bible

God Da Winna

Fo da main music guy sing um, one David kine Song Fo God

¹ I like fo God make ready fo fight. I like fo da peopo dat stay agains him Run away all ova da place. I like fo da ones dat hate him Run away from in front him.

² I like fo God make da peopo Dat do bad tings run away, Jalike da wind make da smoke go way, Jalike da wax melt in front one fire! I like fo da peopo dat do bad tings Come all wipe out Wen dey stan in front God!

³ But fo da peopo dat stay do wass right, I like fo dem come real good inside An feel good wen dey come In front God! I like fo dem dance an sing Cuz dey stay good inside!

⁴ Sing fo God! Sing bout how him da bestes, Sing bout wat kine god him! Tell he da mos importan one, Da One dat ride on top da clouds, He get da spesho name “Yah!” Dance an sing in front him!

⁵ God live inside da place Dat stay spesho fo him. He jalike one faddah guy Fo da kids dat no mo faddah, An jalike one judge Dat take kea da widows.

⁶ God da one dat give one ohana To da peopo dat no mo ohana. Wen he let da prisona guys Go outa prison, He make shua dey come out solid. Ony da peopo dat go agains God Goin live Inside one hot an dry land Wea no mo notting.

⁷ Eh God! Dat time wen you wen go out In front yoa peopo An march thru da boonies, (Time out fo da music.)

⁸ Da groun wen shake an wen rain Cuz you was dea, Da God dat stay on top Mount Sinai, Da God dat da Israel peopo pray to.

⁹ God, you wen dump Plenny rain on top da land, Cuz you like give rain, no matta you no need do dat. No matta da land you own Stay poho dat time, You fix um.

¹⁰ Yoa peopo live ova dea. God, you good, An az why you make shua Dat da peopo dat no mo notting Get wat dey need.

¹¹ Wen da Boss talk, Get choke plenny messenja wahines, jalike one army, Dat go out fo tell Da good kine stuff to peopo. Dey tell:

¹² “All da king guys an dea armies, Dey run away! Da wahines dat stay home, Dey half half all da stuffs Dea guys take away from da kings—

¹³ Even da ones dat stay wit dea sheeps An no fight, Even dem get stuff like doves Wit dea wings all cova ova Wit silva an pure gold.”

¹⁴ Dass wat wen happen, da time Da God Dat Get All Da Powa Wen make all da kings run away. Dat time, get stuff all ova da groun, Jalike wen snow come down On top da Black Mountain.

¹⁵ Eh! All you peopos dat pray on top Da awesome mountains Bashan side, Ova dea wea get all kine pali Inside Bashan,

¹⁶ Wen you guys look from yoa mountains Dat get all kine pali, How come you guys come jealous Wen you look da small kine mountain Dat God like fo be his place fo stay, Da place Da One In Charge Pick fo stay dea foevas?

¹⁷ God wen come Wit awesome war wagons, Ten tousan, an den ten tousan moa. You, my Boss, wen come from Mount Sinai Wit all dem To da place dat stay spesho fo you.

¹⁸ You wen go up to da mos high place. You wen capcha plenny prisonas. You wen take da presents Peopo bring you, Even da peopo Dat no like fo Yah live dea, Dass God, Da One In Charge!

¹⁹ We like tell dat my Boss Stay do good tings fo us guys. Ery day, he help us live. God, he da One Dat stay get us guys outa trouble. (Time out fo da music.)

²⁰ Oua God, he da kine God dat do plenny Fo get us guys outa trouble! He Da One In Charge a me. He do tings fo us guys no mahke!

²¹ Fo shua, da peopo dat stay agains God, He goin bus dea head. He goin smash dea skull an long hair Fo da ones dat still stay do da tings Dat make dem come shame.

²² My Boss tell dis: “I goin bring back da guys Dat stay agains me from Bashan, An from da bottom a da ocean.

²³ Cuz a dat, you my peopo Goin get yoa feets wet Wit da blood from da ones Dat stay agains you, An yoa dogs goin lick up Da blood from dea bodies.”

²⁴ Eh God, peopo goin see yoa parades. Az wen da God dass my king go Inside da place dat stay spesho fo him.

²⁵ Da singa guys go inside firs, Den da music guys, An girls playing da tammorine.

²⁶ Dis how dey goin sing: “Bring erybody togedda Fo tell dat God do good tings fo us! Eh you guys! Tell good tings Bout Da One In Charge, All you peopo dat get blood line From yoa ancesta guy Israel!”

²⁷ Den, da peopo from da mos small ohana Come, dass da Benjamin ohana. An afta, big stack leada guys From da Judah ohana, An da leadas from da Zebulun An Naftali ohanas too.

²⁸ Yoa God wen tell you guys, You gotta come strong. Eh God, show how strong you stay, Jalike you wen show us guys Befo time!

²⁹ Cuz you wen put yoa Temple Inside Jerusalem town, Plenny kings bring presents dea Fo you.

³⁰ Tell yoa army guys fo yell an attack Da odda nations dat no do wass right. Put presha on dem fo dem bring Silva fo pay you guys. Dose nations jalike da wild animals Dat live by da riva Wea da tall reeds grow. Dey jalike one bunch young calfs Dat get da bulls in charge a dem. But God goin scatta da nations Dat like beef.

³¹ Ambassada guys goin come from Egypt. Da Sudan peopo goin bring presents fo God.

³² Sing fo God, ery place Inside da world dat get one king! Make songs fo my Boss! (Time out fo da music.)

³³ Lissen to da One dat stay ride Inside da sky From da time he make da world Till now! Get powa, his voice!

³⁴ Tell erybody, dat God get plenny powa. He da awesome one Dat stay da king fo da Israel peopo. Even up dea inside da clouds, He get powa!

³⁵ God, you awesome an unreal Wen you stay inside da place Dass spesho fo you! Da God fo us Israel peopo, He give powa to his peopo, An make us strong! I like erybody tell Da good tings God wen do!