Songs 66 - Hawaii Pidgin Bible

Mahalo, God

One Song Fo God, fo da main music guy

¹ Yell to God, erybody all ova da world,

² Sing fo tell God he pono, An he da bestes! Tell um you stay good inside cuz a dat!

³ Tell God: “Skery, Da awesome tings you do! Cuz you get supa plenny powa, Even da peopo dat stay agains you Gotta tell dat you da greates, No matta dey no like talk lidat!

⁴ Peopo all ova da world Go down in front you Fo show you love an respeck! Dey sing bout you Cuz dey know wat kine god you.” (Time out fo da music.)

⁵ Go come ova hea! Look, da tings God do! Skery, da kine stuff he do!

⁶ He wen make da bottom a da Red Sea Come dry land, Fo da peopo walk to da odda side. Dass da place wea da peopo Come real good inside cuz a God!

⁷ God da One get da right Fo stay in charge foeva, Cuz he strong. All da time he stay watch Da diffren nations real good. Da nations dat like go agains him, No good dey tink dey mo big den him. (Time out fo da music.)

⁸ All you diffren peopos, Good, you tell oua God, “Mahalo plenny fo da good tings You do fo us!” Good, God hear you guys Tell him, dat he da bestes!

⁹ Cuz God, he da One dat make shua Us guys stay alive, He no let us fall down an mahke.

¹⁰ God, I talk lidis, Cuz you wen tes us guys, Jalike wen peopo melt silva fo make shua No mo junks inside.

¹¹ Jalike you wen catch us inside one trap An put on top oua back Heavy kine stuff fo carry,

¹² Jalike you wen make army guys Ride horse ova oua heads, An jalike us guys wen go Thru fires an floods. But now, you wen get us outa dat An give us eryting us guys need.

¹³ I goin come yoa Temple Wit animals fo make Burn up kine sacrifice. Eryting I wen promise fo do fo you, I goin do um.

¹⁴ I wen make plenny promise lidat Da time I wen get in big trouble.

¹⁵ An now, I goin bring you da animals I wen feed fo make um fat, Sheeps, an cows, an goats. I goin kill um fo make one sacrifice fo you, An burn um up fo smell good fo you. (Time out fo da music.)

¹⁶ All you peopo dat feel Sked an shaking in front God, Go come ova hea an lissen up! I goin tell da story Bout eryting God wen do fo me.

¹⁷ I wen yell to him fo help me, An I wen tell erybody Dat he da mos importan one.

¹⁸ Even if I wen like do someting Ony litto bit bad, My Boss no goin lissen me.

¹⁹ But fo shua, Wen I pray, he lissen.

²⁰ I like tell God “Mahalo!” Cuz he wen do good tings fo me. He neva make deaf ear wen I pray, He erytime stay tight wit me Cuz I his guy.