Songs 65 - Hawaii Pidgin Bible

God Peopo Tell Him “Mahalo!”

One David kine Song Fo God

¹ Eh God! Az good, Peopo tell dat you da bestes, Wen dey go Zion Hill fo pray to you. Az good, dey do da tings Dey wen make one strong promise To you fo dem do.

² You, da one dat lissen wen us guys pray. Az why all da peopo Goin come by you.

³ Wen peopo do bad kine tings Dat make me come bum out, Still yet, you hemo da shame Us get from go agains you.

⁴ Anybody you pick an bring um nea you Fo dem make house Nex to yoa Temple, Dey can stay good inside. Az fo shua! Az good, us come yoa house, Da place dat stay spesho fo you— Us no goin need notting moa.

⁵ Wen we yell to you fo help us guys, You stay do real awesome an unreal tings Cuz you da God Dat stay get us outa trouble. Even da peopo dat live Da odda side a da world An inside da far oceans, Dey stay trus you.

⁶ You da one make da mountains Stay wea dey stay, cuz you strong. Wen you make ready fo fight, You get plenny powa.

⁷ You make da oceans come quiet, You make da surfs so no can hear um. Same ting fo all da noise Da diffren peopos make!

⁸ Da peopo dat live Da mos far places inside da world, Dey even stay sked Cuz dey see da tings you do Fo show who you. Da ones dat live inside da lands Wea da sun come up An da lands wea da sun go down, You do tings fo dem, fo dem yell plenny Cuz dey stay good inside.

⁹ You no foget fo do good tings fo da land. You give da land eryting he need. You make da dirt come plenny rich. God, you get plenny watta ditch, full a watta. Az how you give da peopo Plenny wheat fo harves, Cuz az how you stay make da land ready fo plant.

¹⁰ Ery place da farma guys plow, You make da land drink plenny watta Till da dirt lumps come sof. You sen da rain showas Fo make um come sof. You make eryting come good Fo da land, Az why eryting stay grow.

¹¹ You make da bestes time in da year Wen you give all kine good tings To us guys fo eat, Jalike you put one nice lei On top oua head! Ery place you go, Get ony da bestes kine stuff all ova dea.

¹² Da nice places inside da boonies Get plenny watta. Da hills, dey look Jalike dey feel good inside.

¹³ Da places wea da sheeps eat grass, Look nice Cuz dey get plenny sheeps all ova. Da valleys all cova ova wit wheat, Jalike dey yelling Cuz dey stay good inside, Even jalike dey singing.