Songs 64 - Hawaii Pidgin Bible

God Punish Da Ones Dat Talk Stink

Fo da main music guy, one David kine Song Fo God

¹ Eh God, I like tell Wat stay bodda me, so lissen! I stay sked an shaking Cuz a da ones dat stay agains me. Make shua I no mahke!

² Hide me, so dey no can find me, Da ones dat stay make secret plan Fo do someting bad to me, Da ones dat stay all amp up Fo hurt me.

³ Dey make ready fo tell Tings dat hurt plenny, Jalike dey stay make dea swords sharp. Dey tink how fo talk bad An make eryting come bad, Jalike dey make ready Fo shoot poison arrows.

⁴ Dey hide fo shoot arrows At guys dat no bodda nobody. Dey jump out an shoot um, An dey no sked.

⁵ Dey make one plan fo do bad tings, An dey make shua dey do um. Dey talk story plenny bout how Dey goin put up dea traps. Dey tell, “Nobody goin see us!”

⁶ Dey make one plan fo do Real bad kine tings, an tell, “Us guys wen plan um out real good!” Fo shua, real sly kine Wat peopo tink, you know!

⁷ But God, he goin shoot dem Befo dey know wassup! His arrows goin hurt um plenny.

⁸ Da tings dey tell, All goin come back to dem An make um wipe out. All da peopo dat see dem Goin run away sked.

⁹ All da peopo goin come sked. Dey all goin talk bout da tings Dat God stay make happen, Dey goin undastan wat God wen do.

¹⁰ Da peopo dat stay do wass right, Dey goin stay real good inside Cuz a Da One In Charge. Dey goin stay tight wit him, So den he no goin Let notting hurt dem. Erybody dat get One good heart fo do wass right, Dey goin tell dat Da One In Charge, He da bestes!