Songs 63 - Hawaii Pidgin Bible

Stay Tight Wit God

One David kine Song Fo God, from da time he stay inside da boonies Judah side

¹ Eh God! You da God fo me! I stay look fo you. Me, I go all out fo find you, Jalike I go find watta wen I thirsty! I desperate fo see you, My body come weak, Till I find you! Jalike I stay one place Wea no mo rain an erybody tired Cuz no mo watta ova dea.

² An cuz dass how I feel, I know I goin see you ova dea Inside yoa house dat stay spesho fo you. I like see how strong An awesome you stay.

³ You stay tight wit me cuz I yoa guy. Mo betta I live lidat, Den jus stay alive. I goin tell Dat you da bestes!

⁴ Cuz a dat, I goin tell erybody Dat you do good tings fo me All da time I stay alive. I goin put up my hands Fo show you love an respeck Cuz I know wat kine god you.

⁵ Inside, I feel jalike I get eryting I like, Jalike wen I eat da bestes kine grinds. I goin yell cuz I feel good An tell erybody dat you da bestes!

⁶ Wen I lay down on top my bed, I tink bout you. I tink plenny how you stay.

⁷ Cuz you da One dat stay help me. Wen I know fo shua Dat you take kea me, Az jalike you put yoa wings ova me, Az why I can sing an dance.

⁸ Me, I stay tight wit you. You hold me up so I no fall down.

⁹ But da peopo dat stay look fo me Fo make trouble an kill me, I like fo dem go down Deep inside da groun Wea da mahke peopo stay.

¹⁰ I like fo dem get kill wit swords An da wild dogs Share dea bodies fo grind.

¹¹ Da King, he goin stay real good inside Cuz az how God stay. Erybody dat make one strong promise An tell God fo put kahuna on top dem If dey no do wat dey promise fo do, Dey goin tell dat God da bestes. But erybody dat stay bulai peopo, God goin shut um up.