Songs 62 - Hawaii Pidgin Bible

God Goin Take Kea Me Fo Shua

Fo da main music guy Jedutun sing um, one David kine Song Fo God

¹ Inside, I stay quiet an wait ony fo God. God da ony one Goin get me outa trouble.

² He da ony one dat stay Jalike one big rock wea I can hide, An he get me outa trouble. He jalike one strong wall fo me. Nobody goin make me Fall down real hard.

³ How long you guys Goin attack one guy?! How long all you guys Goin bus him up Jalike you bus up one wall Dat lean one side O one fence dat litto mo fall down?!

⁴ Dem guys ony make plan Fo bring down dis guy Dat get one good rep. Erytime dey bulai somebody Make dem feel good. Wit dea mout, dey tell, “I like God do good tings fo you!” But inside, dey tink, “I like put kahuna on top you!” (Time out fo da music.)

⁵ Inside, I stay quiet, wait ony fo God. God da ony one I stay wait fo, Cuz I know he goin do someting.

⁶ He da ony one dat stay Jalike one big rock wea I can hide, An he get me outa trouble. He jalike one strong wall fo me. Nobody goin make me Fall down real hard.

⁷ God da one dat get me outa trouble An make da peopo get respeck fo me. He jalike one big strong rock Wea I can hide. I stay tight wit God, An he da One stay hide me.

⁸ Eh you peopo! Trus God foeva! Tell him eryting you tink bout! God, he da One Stay hide us guys from trouble. (Time out fo da music.)

⁹ Da peopo dat not importan, Dey jalike da air. Da importan peopo, No can trus wat dey tell you. Wen dey breave, dat air mo heavy Den all dose peopo togedda.

¹⁰ No tink you goin come rich Wen you presha out peopo Fo give you money, O wen you bus um up Cuz dey no give you money, O wen you rip off dea stuffs. An if bumbye you get plenny money, No tink dass da mos importan ting.

¹¹ God tell dis one time, An I hear dis even moa: God, da ony one Dat get powa fo real kine.

¹² Eh, my Boss, you God! An you da ony one Dat stay tight Wit yoa peopo fo real kine! You pay erybody Fo wateva dey wen do.