Songs 61 - Hawaii Pidgin Bible

God No Let Nobody Hurt Me

Fo da main music guy sing um wit string kine instrumen, one David kine song

¹ Eh God! Wen I yell fo help, lissen! Wen I pray, go hear wat I tell!

² From da mos far place on top dis earth I yell fo you help me Weneva I feel all bum out An weak inside. Show me wea fo go Fo hide on top one big rock Dat stay mo importan den me,

³ Cuz you da one take kea a me Fo me no get hurt. You jalike one strong fort, So dat da guys dat stay agains me No can wack me.

⁴ I like stay wea you stay long time, Inside yoa spesho place. I like run by you an hide fo no get hurt, An you cova me, Jalike da muddah bird Hide da small birds unda her wings. (Time out fo da music.)

⁵ You, you my God. An befo time, Weneva I make one promise to you, You wen lissen. You wen give me da kine tings you get Fo da peopo Dat get choke respeck fo you, Cuz dey know who you.

⁶ Give da king plenny mo year fo live! Fo him, an fo da peopo Dat bumbye goin come from him, Fo come kings jalike him!

⁷ I like fo da king Stay king foeva in front God! I like fo God make shua Notting bad goin happen to him. I like God stay tight wit him, An erytime do wat he tell he goin do.

⁸ Az how I goin sing foeva, Cuz I know wat kine god you. Ery day I goin do all da tings I wen make one promise fo do.