Songs 60 - Hawaii Pidgin Bible

Us Pray Cuz Oua Army All Bus Up

Fo da main music guy sing um wit da tune, “Wat Da Lilies Tell.” Az one David kine song fo teach, fo tink bout da time David fight da Aram peopo from Two Rivas an Zobah. Den wen dey stay go home, Joab guys kill 12,000 Edom army guys too inside da Salt Valley.

¹ Bummahs, God! You no give a rip fo us, o wat?! You wen dump all us guys! You wen let da odda army guys Smash thru oua line! You wen stay huhu wit us! Now, we like you make us Come okay one mo time!

² You wen make da land shake An split. Now, fix all da place Wea da land stay bus up, Cuz az jalike da groun Still stay shaking an no come solid.

³ You wen make yoa peopo suffa, Jalike you make um Drink da kine wine Dat make um piloot So dey no can stan up strait.

⁴ But fo da ones Dat get choke respeck fo you, Az jalike you give um one flag Fo dem know wea fo run Wen dey stay fight, One place fo come togedda Wen da odda guys shoot arrow, No ways Dey goin reach yoa guys! (Time out fo da music.)

⁵ An cuz a dat, Fo da peopo you get love an aloha fo, I like fo dem get outa trouble. You get plenny powa, So go do someting fo help dem!

⁶ God wen tell dis, from inside da place Dat stay spesho fo him: “I goin feel real good inside, Cuz I da winna! I goin take ova da Shekem town lands An da Sukkot Valley lands An give um to my peopo.

⁷ Gilead side, all dat land stay mines, Manasseh side, same ting. Efraim jalike da helmet Fo proteck my head. Judah, he jalike da stick I carry Fo show I da king.

⁸ Da Moab land, dass jalike da pot I use fo wash hands, Da Edom land, Jalike I throw my slippas ova dem Fo show I take um ova awready. Wen I take ova da Filisha land, I goin yell cuz I da winna!”

⁹ So! Who goin show me da way fo go To da big town dat get strong wall?! Who goin bring me to da Edom land?!

¹⁰ Goin be you, God, dat goin do dat, No matta you da one Dat wen dump us guys, An you no go wit oua army guys Wen dey go out fo fight!

¹¹ Go come help us guys fo fight Da ones dat stay agains us! Wase time, tink dat odda peopo Can get us outa trouble! Ony you can!

¹² Cuz us get God oua side, Us goin be da winnas! Him da One goin walk all ova Da ones dat stay agains us!