Songs 58 - Hawaii Pidgin Bible

Judge Guys Dat No Do Da Right Ting

Fo da main music guy, wit da tune “No Wipe Um Out,” one David kine song fo sing wen get trouble.

¹ Eh you leada guys! Az true, o wat?! Wen you tell wat peopo gotta do, You suppose to tell um wass right. But you no do dat! Wen you judge da peopo, You suppose to make Same kine to erybody, But still yet you guys make Diffren kine to diffren peopo!

² Fo shua, inside yoa head, You tink how fo do bad kine tings. Dat make you guys ready Fo bus up peopo all ova da world.

³ Da peopo dat stay do bad kine stuff, From da time dey born Dey go da wrong way. From da time dea muddah Was hapai wit dem, Dey stay all jam up. An wen dey talk, dey bulai.

⁴ Dey jalike poison, Da poison from one snake, Da cobra snake dat make deaf ear.

⁵ Az jalike wen da guys make music Fo make da snakes dance. No matta dey know how Fo sing real good to da snakes, Still yet, dat kine snake No hear notting.

⁶ Eh God! Punch out da teet Inside dese bad leada guys mout! Eh! You Da One In Charge! Dem guys, dey jalike young lions, So go pull out dea big teet!

⁷ I like dem disappea jalike watta Dat run away An you no see um no moa. Wen dey shoot dea arrows, I like notting happen.

⁸ I like dem come jalike da snail Dat leave one track Dat bumbye disappea, An I like dem come Jalike one bebe dat mahke befo born, Fo him no see da sun.

⁹ I like fo God wipe out dat kine peopo Mo fas den can make One pot come hot Wen you burn kiawe wood wit thorns, O burn da dry wood, O even da wood you jus wen cut.

¹⁰ Da peopo dat stay do wass right, Wen dey see dat God Pay back da bad guys Fo wat dey wen do, Dey goin come real good inside. Jalike God goin get his feets wet Wit da blood from da bad guys.

¹¹ Den peopo goin tell, “Fo shua, God do good tings Fo pay da peopo Dat stay do wass right! Fo shua, get one God dat judge Da peopo inside da world!”