Songs 57 - Hawaii Pidgin Bible

Sing, No Matta Get Peopo Stay Agains You

One David kine song fo da main music guy fo sing wen get trouble. Get da tune “No Wipe Um Out.” He tink bout da time he run away from King Saul an go hide inside one cave.

¹ Eh God! Do good tings fo me! Do good tings! Cuz wen I aks you fo take kea a me, Den, nobody can hurt me. I like you take kea me, Jalike da muddah bird Put da bebe birds unda her wing Fo nobody hurt dem. I goin stay by you fo nobody hurt me, Till all dis stuff pau, Dat can wipe me out Jalike one storm.

² I yell to God fo help me, Da God Dass Mo Importan Den All Da Odda Gods, Da God dat know wat he like me fo do, An he goin make um fo me do um.

³ I like fo God reach down from da sky Fo get me outa trouble. If somebody like make any kine to me, I like God make um come shame. (Time out fo da music.) I like fo God stay tight wit me Cuz I his guy An he erytime do Wat he tell he goin do.

⁴ Weneva I go sleep, Da peopo dat stay agains me, Dey jalike lions all aroun me Dat like eat peopo, An get sharp teet jalike spears an arrows. Wen dey talk, jalike dey cut me Wit one sharp sword.

⁵ God, I like erybody know, Dat you mo big even den da sky! I like erybody on top da earth, Know how awesome you stay!

⁶ Da peopo dat stay agains me, Dey wen make ready One net fo catch me. Cuz a dat, I wen feel all bum out. Dey wen dig one big hole Wea dey know I goin go, But dey da ones Wen fall down inside dea! (Time out fo da music.)

⁷ Eh God! Inside, I stay solid! I stay solid inside! I all ready fo sing an make music!

⁸ I like wake up An make ready my small harp An my bass harp, An get up befo da sun come up.

⁹ You my Boss, An I goin tell all da diffren peopos dat you da greates! I goin make music fo you Fo all da diffren countries hear!

¹⁰ You stay plenny tight wit yoa peopo Jalike get plenny sky up dea! You da kine God us guys can trus plenny, Jalike get plenny clouds inside da sky!

¹¹ God, I like erybody know, Dat you mo big even den da sky! I like erybody on top da earth know How awesome you stay!