Songs 55 - Hawaii Pidgin Bible

My Fren Go Agains Me

One David kine song fo make peopo tink plenny, fo da main music guy sing um wit string instruments

¹ Eh God! Try lissen me wen I pray! No go hide wen I aks you fo help me!

² Lissen up an do someting! Get stuff dat bodda me plenny. Az why I no can res. I stay all futless

³ Cuz da guys dat stay agains me Tell dey goin bus me up! Da bad guys presha me. Dey make bad kine tings happen fo me. Dey come huhu wit me, An dey like stay lidat fo long time.

⁴ I stay all sore inside. I come all sked dat I goin mahke.

⁵ I come all sked an shaking, I no can handle, cuz I stay real sked.

⁶ I tink, “Bummahs! I like put on wings jalike one dove Fo fly away to one place Wea I can stay okay.

⁷ Fo shua, I like run far away, I like make house inside da boonies. (Time out fo da music.)

⁸ “I like go quick to one place Wea no mo strong wind an storm.”

⁹ Boss, try make da tings Dose peopo tell dey goin do Come all hamajang, Cuz all ova da big town, I see peopo Dat stay bus up each odda An fight each odda.

¹⁰ Day time an nite time, Da bad guys go aroun da town, Even on top da town walls. An inside da town, Get peopo stay do bad kine stuff An make plenny trouble.

¹¹ Inside dea, get peopo Dat stay bus up eryting. Wea peopo come togedda, Dey put presha on odda peopo An bulai dem, an no stop.

¹² I can handle wen da guys dat stay agains me Like make me come shame. But I go hide wen da peopo dat hate me Make any kine to me.

¹³ But you know wat I like tell dat kine guy?! You da guy dass da problem! Me an you, us wen stay tight befo time! You was da one I tell Bout eryting I tink. You was my good fren dat time!

¹⁴ Was good wen me an you Wen hang togedda. Plenny time we wen go God House Wit all da odda peopo.

¹⁵ I like fo da peopo mahke Dat stay agains me, Wen dey tink notting goin happen To dem! I like fo dem go down Da Mahke Peopo Place Wen dey still alive, Cuz any place dey live, Dey stay do bad kine stuff.

¹⁶ But me, I stay yell to God fo help me. Da One In Charge Goin get me outa trouble!

¹⁷ Evening time, morning time, Noon time, wenevas, Wen I stay grumble an moan Cuz I stay hurting, Da One In Charge Goin lissen wat I tell.

¹⁸ Cuz God goin get me outa trouble Fo let me win dis war An no get hurt. He goin make eryting come good fo me, No matta get plenny peopo Dat like fight me.

¹⁹ God, he stay sit on top his throne From long time An he no change. (Time out fo da music.) God hear wat happen, An he goin make dose guys lose face, Da ones dat no stay sked a God.

²⁰ Da guy dat was my fren wen go hurt me Wen eryting was good wit me an him. He wen make jalike he no need fo do Wat he wen promise fo do.

²¹ Da tings he wen tell soun nice, But inside, he ony like beef. He talk nice kine, But da tings he tell, Jalike one sword fo stab me.

²² All da stuff dat bodda you guys, Turn um ova to Da One In Charge. He goin make shua you can handle. Da peopo dat stay do wass right, He no goin let dem Come all weak, eva, Fo dem no stan up.

²³ But God, you goin throw down Da bad kine peopo Inside da deep hole fo mahke. Da kine guys dat like make peopo Bleed an mahke, An dat like bulai peopo, Dey goin live ony half dea life. But me, I stay trus you!