Songs 51 - Hawaii Pidgin Bible

Eh God, Gimme Chance!

Fo da main music guy, one David kine song bout da time Nathan, da guy dat talk fo God, go by David afta David fool aroun Batsheba

¹ Eh God! Give me chance, Da way erytime you stay tight Wit yoa peopo. Cuz you stay get plenny pity fo dem, Az why you gotta hemo da shame I get Cuz I wen go agains you.

² Make me come all clean inside, Cuz wat I wen do, no was right. Make me come all clean inside Fo me pray one mo time.

³ I know fo shua I wen go agains you, Ova an ova, I tink plenny Bout da bad ting I wen do.

⁴ Was ony you dat I wen do da bad ting to. Da way you see me, Was no right, da ting I wen do. Eh God, you stay perfeck, An you do da right ting Wen you tell you gotta punish me.

⁵ Fo shua, from da time I born, I stay do da wrong kine stuff, Even from da time my muddah Was hapai wit me, Dass how I stay.

⁶ Fo shua you feel good wen I tell da trut, Even bout da secret kine tings Dat nobody but me know. So help me know fo real kine Wat I gotta do Bout da stuff I stay hide.

⁷ Make me come clean inside Fo no do bad tings no moa! Jalike wen da pries guys make one sacrifice An sprinkle da blood Wit one oregano branch, Fo me come clean inside fo pray! Wash me good till I come Mo clean inside, Mo clean den da white snow!

⁸ Make shua I know Dat you wen hemo my shame. Den I can dance an sing an yell Cuz I stay good inside! Fo now, I feel all bus up. So make me feel good inside One mo time!

⁹ No look da bad tings I wen do. Hemo da shame Fo all da wrong kine tings I wen do.

¹⁰ Eh God! Put inside me One new kine heart Dat ony tink good an clean kine stuff. Give me one new kine attitude Dat no change.

¹¹ No throw me out Fo you no stay tight wit me no moa. No take away from me Yoa Good An Spesho Spirit.

¹² Let me stay good inside one mo time Cuz you get me outa trouble. Give me da kine spirit inside me Dat make me like do Wat you tell me fo do, Den I goin stan strong,

¹³ An fo shua I goin teach Da peopo dat go agains you. Den dey goin know Da way you tell um fo live. An dass how da peopo Dat do bad kine stuff, Goin come back to you.

¹⁴ Eh God! Let me go, an hemo my shame, Cuz I wen set up one guy fo mahke! Eh God! You my God, Da One dat get me outa trouble! Az why I can make big noise An let erybody know Bout how you erytime Do da right ting!

¹⁵ Eh Boss! Let me tell good tings bout you An tell peopo how awesome you stay!

¹⁶ Fo make you stay good inside, Da sacrifices I make Not da main ting! Jus cuz I make One burn up kine sacrifice, Dat no make you feel good Bout me, you know!

¹⁷ Eh God, dis da kine sacrifice you like: You like me feel all bus up inside Wen I do one bad kine ting. Wen I stay bus up an sore inside Cuz I wen do someting dass no good, You no goin tell I good fo notting.

¹⁸ Eh! You Da One In Charge! Try make eryting Come good fo da Zion Hill peopo! An build da walls Aroun Jerusalem town!

¹⁹ Den you goin feel good inside Cuz a da right kine sacrifices Da peopo dea goin make. Dey goin bring bulls by yoa altar Fo make burn up kine sacrifices Fo ony you.