Songs 49 - Hawaii Pidgin Bible

No Make Sense Trus Da Money

One Song Fo God fo da Korah ohana guys sing falsetto kine

¹ Hear dis, all you peopos! Try lissen up, all you peopo Dat live all ova da world!

² You regula kine peopo, Dat get big name. Some a you get plenny, Some a you no mo notting.

³ I goin tell you guys How fo know wat fo do erytime. Wen I tink plenny, I undastan wat I tink bout.

⁴ I lissen real good to wat God teach. I play da harp wen I tell peopo Wat da stuff mean Dat stay hard fo figga out An make you tink plenny.

Money No Can Buy Da Kine Life Dass Fo Real

⁵ Wen get trouble, I no need stay sked, Wen da bad guys dat like shaf me, Come all aroun me.

⁶ Dey stay shua dey goin stay okay Cuz dey get plenny powa, An dey talk big Bout how much stuffs dey own.

⁷ No mo nobody can pay God Fo let his braddah stay alive. You no can give God money Fo somebody no mahke.

⁸ Fo no mahke foeva, Cost mo plenny den anybody can pay.

⁹ You tink somebody can live foeva An no go inside da grave?! No way!

Erybody Goin Mahke

¹⁰ Even da peopo dat know Wat fo do erytime, Dey mahke, Same ting da peopo dat tink dey get um, But dey no get um, An jalike da stupid peopo too— All dem disappea. Dey leave all dea stuffs Fo odda peopo dat come afta.

¹¹ Dey wen put dea names On top da land dey own, Fo odda peopo know dass dea land, Dea grave goin be Da ony home dey get!

¹² No matta peopo Get plenny respeck fo dem, No way dey goin stay live long time. Dey goin come wipe out Jalike da animals.

Da Ones Dat Stay Trus God, Dey Come Out Okay

¹³ Dass wat goin happen wit da peopo Dat tink dey get um But dey no get um. Same ting goin happen To da ones dat come afta, An like make jalike dem. (Time out fo da music.)

¹⁴ Dese guys, dey stay go Da Mahke Peopo Place. Jalike wen one sheep farma Take his sheeps one place fo kill um, Dese guys goin get kill. Wen da morning time come, Da peopo dat stay do wass right Goin take ova dem. Dea body goin come all poho, Cuz dey stay da Mahke Peopo Place, Far from dea big houses.

¹⁵ But fo shua, God goin pay da price So I no gotta go Da Mahke Peopo Place. (Time out fo da music.)

No Matta You Get Plenny Stuffs, You Still Goin Mahke

¹⁶ No come sked wen somebody come rich An pile up plenny stuffs, his place.

¹⁷ Cuz wen he mahke, He no goin take notting wit him. All his stuffs no goin go down wit him To da Mahke Peopo Place.

¹⁸ All da time he stay alive He tink good tings Goin happen to him. An odda peopo tell, “Eh, good, How tings stay go fo you, Cuz you wen do good tings Dat help you!”

¹⁹ But him stay going Wea all his ancesta guys stay, To da place wea dey no goin see Da light no moa.

²⁰ No matta peopo get Plenny respeck fo somebody, Dey no undastan dis: Dey all goin come wipe out, Jalike da animals.