Songs 48 - Hawaii Pidgin Bible

Mount Zion, Wea God Town Stay

Song Fo God fo da Korah ohana guys sing

¹ Da One In Charge, he da greates! Real good fo erybody Tell he da greates Ova dea inside God town, On top da hill dat stay spesho fo him!

² Look awesome up dea, Mount Zion, Mo awesome den Mount Zafon, Da mountain fo da odda gods. Erybody inside da whole world Stay good inside Cuz Jerusalem stay da town Wea God da big King stay.

³ God stay inside da strong buildings Dat stay dea. He make shua da peopo ova dea know Dat notting goin hurt dem, Cuz he jalike one strong building Fo dem too.

⁴ Ova dea, da king guys An dea army guys come togedda. Dey go thru da land togedda Fo take ova Mount Zion.

⁵ But wen dey look Mount Zion, dea jaws drop! Dey come sked an run away!

⁶ Real fas dey come all sked an shaking, Jalike one wahine Dat start fo born one bebe!

⁷ Jalike wen da strong wind From da east side Bus up da big Tarshish kine ships!

⁸ Da tings we wen hear bout, Now we see um inside da town Wea Da One In Charge, Da God Ova All Da Armies stay, Da town wea oua God stay. God put his town dea foeva. (Time out fo da music.)

⁹ Eh God, wen us guys inside yoa Temple, Us guys tink plenny fo no foget Da way you stay tight wit us guys.

¹⁰ Eh God, get peopo Inside da mos far place On top da earth, Dat know wat kine god you, An dat tell dat you da greates. You get da powa Fo do da right ting erytime.

¹¹ Da peopo dat stay live Mount Zion Stay good inside. Da peopo from da towns All ova Judah side, Stay good inside too. Cuz you judge peopo da right way.

¹² Go walk all da way aroun Zion town, Count how much watch towas get dea.

¹³ Check out da strong wall aroun da town, Go walk thru da strong buildings Inside da wall, Fo you guys tell bout um bumbye To da peopo dat goin come afta.

¹⁴ Tell um dis: “Dis God, He da God fo us guys, all da time. He goin show us da way fo go Till us mahke.”